Tunisassiat nunatsinneersut akikinnerulersikkusuppaat
Erngup nukinganik nukissiuuteqarneq iluaqutigalugu inuussutissanik tunisassiornermi akikillisaasoqarsinnaagaluartoq, Kommune kujallermi inuussutissarsiorneq pillugu ataatsimiitsitaliami siulittaasoq Kalistat Lund (S) oqarpoq.
- Ullumikkut inuussutissanik avataaniit eqqussuisoqartorujussuuvoq. Pitsaanerpaajunngikkaluarput, kisianni akitigut allatigullu unammillerluarsinnaagamik taamaappoq. Nunatsinni tunisassiat qanoq ilillutik unammillersinnaanersut ujartorneqartariaqarpoq. Ilaatigut erngup nukinga atorlugu nukissiuuteqarneq atorluarneqartariaqarpoq, suliffissuarni innaallagiaq imerlu akisoorujussuumata tamakkua akikillisaavigineqarsinnaagaluarput, tamannalu pillugu Kommune Kujallermiit oqaloqataanissatsinnut piareersimavugut, Kalistat Lund oqarpoq.
Narsami inuussutissat pillugit isumasioqatigiisitsisoqarnerani Kommune Kujallermi politikkerit Naalakkersuisullu peqataatitaasa saniatigut kujataani inuussutissarsiutinik ingerlatsisut, soorlu Neqi A/S, tuttuutillit, savaatillit, Inuussutissalerinermik ilinniarfik allarpaaluillu peqataatitaqarput.
