Tunillatsittut amerliartupiloortut killilersuinerillu sivitsorneqartut
Nunatsinni inuiaqatigiinni tuniluuttoqangaatsiarpoq. Pingaartumik Aasianni, Upernavimmi Sisimiunilu tuniluuttoqarpoq. Tamannalu Naalakkersuisut siulittaasuata Múte B. Egede nakorsaaneqarfiullu ernumassutigaat.
- Sumiiffiit arlallit ajoraluartumik tuniluuffiusumik inissisimapput. Juulimili kujataanit Upernavimmut tuniluttoqarnikuuvoq, Múte B. Egede oqarpoq.
- Tamanna pissutsinut ajornakusoortitsivoq, taamaammat inuit sapinngisamik eqitaarnaveersaannissaannik kaammattuuteqarfigaagut. Inuit imminnut paarinissartik peqqissutsimullu tunngatillugu innersuussutinik malinninnissaq namminneq akisussaaffigaat.
Sumiiffinni ukunani pisortat angallassissutaannut ilaaniarnermi uppernarsaateqartoqaqqaassaaq.
- Tasiusaq
- Upernavik Kujalleq
- Nutaarmiut
- Nuussuaq
- Innaarsuit
- Naajaat
- Aappilattoq
- Kangersuatsiaq
- Kullorsuaq
- Maanna aamma Sisimiuni
Nunatsinni coronamik tuniluuttoqarnera pissutigalugu tuniluutsitsinaveersaarneq ajornakusoorpoq. Corona sumiiffinni arlalinni piffissami kingullerni tuniluuppoq. Tamanna pissutigalugu pingaartumik Aasianni, Upernavimmi Upernaviullu nunaqarfiinut atuuttunik malittarisassaqarpoq.
Malittarisassat taakku Sisimiunut maanna aamma atuuttussanngorput.
Upernavimmiit, Aasianniit Upernaviullu nunaqarfiinit pisortat angallassissutaannut timmisartumut allanulluunniit bussinut ilaanissamut malittarisassaqarpoq: Tamakkiisumik akiuussuserneqarsimanissaq imaluunniit tunillatsissimannginnermut uppernarsaammik sivisunerpaamik akunnernik 48-nik pisoqaassusilimmik takutitsinissaq piumasaqaataavoq. Malittarisassat taakku juulip ulluisa 28-anni atuutilersinneqarput.
Malittarisassat taakku aggustip ulluisa 24-ata tungaanut atuutissapput.
Sumiiffinnit tuniluuffiusunit, tassa Aasiannit, Upernavimmit Sisimiuniillu angalasut tikinnerminnit ulluni tallimani angerlarsimaannassapput, ullullu tallimassaanni coronamut misissortissallutik.
Aammattaaq peqqinnissamut naalakkersuisup, Kirsten Fenckerip (Naleraq) nunatsinni najugaqanngitsut Danmarkimit tikinniartut aatsaat tamakkiisumik kapitereersimagunik tikissinnaasut nassuiaatigaa. Tamanna marlunngorpamit aggustip ulluisa 24-annut atuutsinneqassaaq.
Pingajuattut nunarput tamakkerlugu sinersortaammut allanullu pisortat angallassissutaannut ilaaniartut qanermut assiaquteqaqqusaalerput.
Meeqqat inuusuttullu atualerlutillu ilinnialertussat
Inuusuttorpassuit ilinniakkamik nangitsiartorlutik aallartitsiartorlutilluunniit nunatsinni nunanilu allani angalapput. Tamanna ilinniarfeqarfinni tuniluuttoqarsinnaaneranut aamma ernumanartoqartitsivoq.
- Inuusuttut illoqarfinnut allamut nunanulluunniit allanut angalasussat ilinniarfeqarfissassinnut attaveqarnissassinnik kaammattuuteqarfigaassi, Múte B. Egede oqarpoq.
Meeqqat atualeqqaarnerannut atatillugu kaffillertoqartarnera ileqqutoqaavoq. Naalakkersuisut siulittaasuatali tuniluuttoqannginnissaa pissutigalugu kaffillernissap kinguartinneqarnissaa kaammattuutigaa.
- Tamassi kaffillerusuttusi paasisinnaalluinnarpara, tuniluunnerli maannakkutut isikkoqartillugu tamanna kinguartissiuk. Tunillatsissimasut tunillatsinnertik ilisimanagu inunnut allanut akuleruttorsimasut takusinnaavarput.
