Tunillatsittut amerliartortut coronapassilu Nuummi atorneqaqqilersoq

Nuummi najugaqaruit coronapassi atoqqilissavat. Nuummi tunillatsissimasut amerlassusaat sapaatip akunnerani kingullermi amerliartuinnavipput.

Illoqarfiit pingaarnersaanni tunillatsissimasut paasineqartut ullup ataatsip kingulliup ingerlanerani arfineq-pingasuupput, taamaalillutik covid-19-imik tunillatsissimasut katillutik 79-iulerlutik.

Nuummi tunillatsissimasut sapaatip akunnerata siuliani arfineq-marluinnaapput.

Illoqarfimmi tunillaassuuffiit aallaavii ilisimaneqanngillat, taamaammat coronapassi atorneqaqqilertariaqartoq, Naalakkersuisut nalunaarutigaat.

Taanna maannakkumiit septembarip ulluisa 30-at ilanngullugu atuutissaaq.

Taamaammat neriniartarfinnut, imerniartarfinnut timigissartarfinnullu isissaguit tamakkiisumik akiuussuserneqarsimassaatit. Tamakkiisumillu akiuussuserneqarsimanngikkuit tunillatsissimannginnermut uppernarsaammik sivisunerpaamik akunnernik 48-nik pisoqaassusilimmik takutitsisinnaassallutit.

Sumiiffiit uku tamakkiisumik akiuussuserneqarsimallutit imaluunniit coronamik tunillatsissimannginnermut uppernarsaammik sivisunerpaamik akunnernik 48-nik pisoqaassuseqartumik peqaruit aatsaat iserfigisinnaavatit:

• Neriniartarfiit, kaffisorniartarfiit, imerniartarfiit, diskotekit assigisaallu, kiisalu silami nunaminertat taakkununnga atasut.
• Kulturikkut sullissiviit: kulturikkut illorsuit, filmertarfiit, katersugaasiviit, inersuit saqqummersitsiviit assigisaallu.
• Innuttaasut illui assigisaallu.
• Atuakkanik atorniartarfiit.
• Illup iluani silamilu timersortarfiit, soorlu init timersortarfiit, inersuit timersortarfiit, naluttarfiit, timigissartarfiit aamma isikkamik arsartarfiit.
• Nujalerisut, tagiartuisartut, pinnersaasarfiit assigisaallu.

Akiuussutissamik kapitisimanngikkuit tunillatsissimannginnermullu uppernarsaateqarnak ukununnga suli isersinnaavutit:

• Pisiniarfiit
• Allakkeriviit
• Mittarfiit
• Pisortani oqartussaasut sulliviillu pilersuiviit kiffartuussinermi saaffiginnittarfii.
• Assartuutit tamanit atorneqarsinnaasut utaqqisarfii.
• Init suliannik ingerlatsivigisassatit.

Sisimiuni malittarisassat sukannersut aasaanerani atuussimasut qasukkaamiarneqalaarput.

Sisimiuni inuit katerinnissaannut ullumikkumit killilersuisoqarunnaarpoq. Inuit amerlanerpaamik 20-t ullumikkumut kisimik katerissinnaatitaagaluarput. Qanermut assiaqutit aamma piumasaqaajunnaarput.

Sisimiuni tamanit ornigarneqarsinnaasunut isernissamut tamakkiisumik akiuussuserneqarsimaneq kisimi piumasaqaataalerpoq.

Nuummiit Sisimiuniillu nunatsinni sumiiffinnut allanut angalasut katerinnernut pisortalluunniit sumiiffiinut allanut najuuteqqusaanngillat.

Taakku tikinnerminnit ullut tallimassaanni misissortinnerata tunillatsissimannginnerat uppernarsarpagu aatsaat taamaaliorsinnaalissapput.

Tamakkiisumik akiuussuserneqarsimanermut uppernarsaat coronapasiusinnaallunilu akiuussuserneqarnermut atatillugu pappiaraq pissarsiarineqartuusinnaavoq imaluuniit peqqinnissaqarfimmit akiuussuserneqarsimanermut uppernarsaataasinnaalluni.