Assi: Malik Brøns / KNR

Tunillatsissimasut nutaat 24-t: Nuummi sumiiffinni tamani tunillatsissimasoqarsinnaavoq

Nuummi tuniluunneq suli siammaakkiartorpoq. Illoqarfiit pingaarnersaanni tunillatsissimasut maanna 72-iupput.

Nuummi tunillatsittut amerliartorput.

Illoqarfiit pingaarnersaanni tunillatsissimasut nutaat 23-t ullup ataatsip kingulliup ingerlanerani paasineqarput.

Nakorsaaneqarfik naapertorlugu paaqqutarinniffinnut tunillaassuuffiusunut toqqaannartumik atassuteqartut akornanni suli tuniluuttoqarpoq. Meeqqat marluk tunillatsissimasut nutaat akornanniipput.

Tamatuma saniatigut inuusunnerusuni aamma tunillatsissimasoqarpoq.

- Amerlasuut tallimanngornermi arfininngornermilu illoqarfissiorsimapput ilaatigut, Kristinemut, Daddy's Skylinelu isersimaffigisimallugit. Amerlanerpaat Kristinemumiissimapput, nakorsaaneqarfik allappoq.

- Tunillatsissimasut sumiiffigisimasaani tunillatsissimasinnaasunik suli misissuisoqarpoq. Tunillatsissimasut ilaat sanasut suliffeqarfianni angisuumi sulisuuvoq, allalu suliffeqarfimmi angisuumi sulisuulluni.

- Nuummi sumiiffinni tamani maanna tunillatsissimasoqarsinnaalerpoq, taamaammat tuniluuttoqarnera pakkersimaarniarlugu kikkut tamarmik mianersorluaqqissaarnissaat kaammattuutigineqarpoq.

Nuummi tunillatsissimasut nutaat 14-it ippassaq marlunngornermi paasineqarput.

Nakorsaaneqarfiup tunillaassuuttoqangaatsiarnissaanut aarlerinaateqartorujussuusoq ippassaq nassuiaatigaa. Tunillatsissimasummi amerlasuut tunillatsissimanerminnik ilisimaneqannginneranni illoqarfimmi angalaarsimapput imerniartarfissiorsimallutillu.

Piffissami uani sumiiffinni ukunaniissimaguit ullumi aqaguluunniit misissortissasut, nakorsaaneqarfik paasissutissiivoq:

Pingasunngorneq septembarip 8-at:

  • Nuussuup Timersortarfiani Arsarnermi nalunaaqutaq 15.00-imit 16.00-imut

Sisamanngorneq septembarip 9-at:

  • Fitness.gl nalunaaqutaq 15.00-imit 17.00-imut
  • Firmafodbold på Stadion nalunaaqutaq 18.30-mit 20.00-imut

Tallimanngorneq septembarip 10-at: 

  • Pascucci nalunaaqutaq 15.00-imit 16.00 aamma 23.00-imit – 24.00-imut
  • Killut nalunaaqutaq 19.30-mit 20.30-mut
  • Maximut nalunaaqutaq 20.30-mit 21.00-imut
  • Tuttu nalunaaqutaq 21.00-imit 22.00-imut
  • Kirstinemut nalunaaqutaq 22.00-imit – 23.00-imut aamma 01.00-imit til 03.00-imut
  • Skyline nalunaaqutaq 00.00-imit - 01.00-imut
  • Daddy’s nalunaaqutaq 01.00-imit 04.00-imut

Nuummi misissuisarfik ullumi nalunaaqutaq 16.00-ip tungaanut ammassaaq.

Illoqarfiit pingaarnersaanni tunillatsissimasut sapaatip akunnerata siuliani amerliartulernerat taamaalillutik amerliartuinnarput.

Tunillatsissimasut nutaat arfineq-pingasut sapaatip akunnerata naanerani paasineqarput, sapaatip akunneratalu naanerani paasineqartut taakku tamarmik meeqqerivimmut Timmiaaqqanut attuumassuteqarput. Tunillatsittut nutaat taakku meeqqerivimmiittunut qatanngutaallutillu angajoqqaajupput.

Meeqqerivimmiittartup ataatsip sulisullu tunillatsissimanerisa paasineqarneratigut sapaatip akunnerata siuliani matuneqarallarnerata kingornatigut illoqarfiit pingaarnersaanni tunillatsittut amerliartupiloorput: Atuarfimmi ASK-imi klassimi ataatsimi atuartut angerlartinneqarput, USK-imi klassini pingasuni atuartut angerlartinneqarput, sunngiffimmilu ornittakkat Narsarmiutaq aamma AKO ILLU matuneqarlutik.

Nuummi tunillatsissimasut sapaatip akunnerata ataatsip matuma siorna arfineq-marluinnaapput.

Nunatsinni tunillatsissimasut katillugit 82-iupput. Ullup ataatsip kingulliup ingerlanerani Qeqqata Kommuniani tunillatsissimasunik nutaanik aamma paasisaqartoqarpoq.

Tunillatsissimasut kommunikkaarlugit ima agguataarneqarput:

  • Avannaata Kommunia: Tunillatsissimasoq ataaseq.
  • Kommune Qeqertalik: Tunillatsissimasoqanngilaq.
  • Qeqqata Kommunia: Qulingiluaq. Ippassaq arfineq-pingasuupput.
  • Kommuneqarfik Sermersooq: Tunillatsissimasut 72-it.
  • Kommune Kujalleq: Tunillatsissimasoqanngilaq.

Nunatsinni coronavirusi pillugu
killiffik

Tunillatseqqasut 36  
Ullumi tunillatsittut 9  
Siullermik kapitissimasut 71%  
Aappassaa kapitissimasut 65%  
Tunillanneqarsimasut 654  
Uninngasut 0  
Anersaartuuteqartitaasut 0  
Toqquteqartut 0  
corona.nun.gl-imi kisitsit takukkit  
   Nutarterneqarpoq: 
Oktobarip 15-iat 11:30
 

Coronavirusimik tunillatsinissaq pinaveersaaruk