Tunesiami præsidenti, Ben Ali, nunaminit qimaasimavoq
Nutaarsiassaqartitsiviimmi AFP-mi allaaserineqartut malillugit tusarfiit naalakkersuisunut qanittut præsidentip qimaasimaneranik kalerriipput.
Præsidentip tunuarnissaa piumasaralugu akerliussutsimik ulluni arlalinni takutitsisoqartareersorlu, sukannersumik naalakkersuisoqassasoq ullumi nalunaarutigineqarpoq. Inuit arlalissuit eqqissiviilliortoqarnerani toqupput.
Præsident Ben Ali Tunesiami ukiuni 23-ni aqutsereerpoq, nunallu qimannginnerani TV-kkut sioorasaarutigaa akerliussutsimik takutitsisut aqqusinerni takussaaginnarpata sakkutuut isumannaallisaasut politiillu taakku tungaannut eqqaasserujussuartaqqullugit piumaffigineqassasut.
Ben Ali-p sukangasuumik naalakkersuinera, suliffissaaleqineq, ileqqorlunneq ulluinnarnilu atortussat piffissami kingullermi akitsoraluttuinnarnerat akerliussutsimik takutitsisartut kamaatigisorujussuuvaat. Ilinniagartuup, oqartussaasunit akuerineqaqqaarani, naatitanik sapaatip-akunnerani uani siusinnerusukkut tuniniaalluni aningaasamininnguanik inuussutissaminik pissarsiniarnera politiit akornusersormassuk, eqqissiviilliorneq suli sakkortusineruvoq. Ilinniagartooq kinguninngua imminut ikuallalluni toquvoq.
Tunesiami eqqissiviilliorneq Arabiami tuppatigineqartorujussuuvoq, nunarpassuimmi inuttut politikkikkullu taamatorpiaq aamma ajornartorsiorput.
