Tuluk Ilulissat kangiani naluttoq: Silap pissusiata allanngoriartornera nunarsuarmut erseqqissarniaraa

Lewis Pugh Ilulissat kangiani 7,8 kilometerit naluppoq. Naluffigisaa ulorianarlunilu nillertorujussuusoq taassuma oqaatigaa.
- Pinngortitami ajunaarnersuarnik amerlasuunik ukioq manna takusaqarpugut – Grækerit Nunaanni pinngortitami ikuallannerit, Tysklandimi qarsutsinerit, Texasimi nittaalartalimmik anorersuarnera. Issittumili maani aamma susoqarnera tamanut aamma paasitikkusuppara, Lewis Pugh oqarpoq. Assi © : Lewis Pugh Foundation (LPF Network)
Allattoq Malik Brøns
septembarip 07-at 2021 15:19

Tuluk Ilulissani aggustip naanerani nillarissumi arlaleriarluni naluppoq.

Lewis Pughimi Ilulissat kangerluani ulluni aqqaneq-marlunni katillugit 7,8 kilometerit naluppoq.

Lewis Pugh Naalagaaffiit Peqatigiit imarpinnut illersuisoraa, taannalu pissutsini ingasattuni siornatigut naloreernikuuvoq, assersuutigalugu Qalasersuarmi, Mount Everestimi Sikuiuitsoq Kujallermilu.

Ilulissalli kangerlua tassunga unammillernangaatsiarpoq.

 

Assi © : Lewis Pugh Foundation (LPF Network)

Assi: Lewis Pugh Foundation (LPF Network)

- Nalunneq una unammillernangaatsiarpoq. Nillernera ullullu tamaasa nillertuinnarmi timima kissarserfissaanik periarfissaqarnanga nalunnissara pissutigiinnarnagit. Kisianni pissutsit ulorianarluinnarnerat aamma pissutigalugit, Lewis Pugh tusagassiuutinut nalunaarummi oqarpoq.

Taassuma nillertuinnarmi nalunnissamik aalajangernera sermip sukkasuumik aakkiartorneranik ukkatarinnitsitsiniarneranik pissuteqarpoq.

- Pinngortitami ajunaarnersuarnik amerlasuunik ukioq manna takusaqarpugut – Grækenlandimi pinngortitami ikuallannerit, Tysklandimi qarsutsinerit, Texasimi nittaalartalimmik anorersuarnera. Issittumili maani aamma susoqarnera tamanut aamma paasitikkusuppara.

Taassuma nunarsuup imartaasa 30 procentiisa 2030-nngortinnagu illersorneqarnissaat Naalagaaffiit Peqatigiit Glasgowimi silap pissusia pillugu novembarimi ataatsimeersuarnissaanut kaammattuutigaa.

Taassuma nunarsuarmi siuttunut imarpiit silap pissusiata allanngoriartorneranut pakkersimaarnissaat qanoq pingaaruteqartiginersoq tassani erseqqissaatiginiarpaa. Piffissarlu ungasinnerusoq eqqarsaatigalugu pisussaaffilersuinermit erngertumik iliuuseqartoqarnissaa taakkununnga kaammattuutiginiarpaa.