Tuluit suliffeqarfiutaat eqqorneqariaannaapput

Tuluit Nunaat Ruslandimut sorsunnerarlutik nalunaarsimasut, Ruslandimi aviisit arlallit oqariartuutigaat.

Aallartitat Ruslandimeersut sisamat Tuluit Nunaanniit anisitaanissaat tuluit naalakkersuisuisa ippassaq aalajangereeraallu Ruslandimi taama qisuariartoqarpoq.

Ruslandip tunngaviusumik inatsisaa naapertorlugu Ruslandimi innuttaassusillit nunanut allanut tunniunneqarsinnaanngillat.

Kilitsissiap Ruslandimeersup Alexander Litvinenko-p London-imi siorna toqutaaneranut atatillugu russeq alla Andre Lugovoi toqutsisimasutut pasineqarpoq, eqqartuussisutigoortinnissaalu siunertaralugu Ruslandimit Tuluit Nunaannut tunniunneqarnissaa piumasaqaatigineqarluni.

Ruslandimi aviisit Ruslandimi naalakkersuisunut tapersersuisartut, naalakkersuisunillu annerusumik minnerusumillunniit aqunneqartut, sakkortuumik qisuariaateqarput Tuluit Ruslandimut sorsunnerarlutik nalunaaruteqarsimasut oqariartuutigalugu.

Tuluit naalakkersuisuminnik tapersersuisut inunnik isumasiuinerit takutippaat, Ruslandimili naalakkersuisut illua’tungiliuttutut inissipput, Andre Lugovoi-lu Tuluit Nunaannut tunniunneqassappat takussutissanik amerlanerusunik tigusaqaqqaarusupput.

Danmarks Radio-p Ruslandimit ilanngutassiisartua Poul F. Hansen taama tusarliussivoq.

Atorfilittat Tuluit Nunaanneersut maannalu Ruslandimiittut Ruslandimit anisitaanissaat ilimagineqarsinnaassasoq oqaatigineqaraluartoq, allatut iliortoqarnissaa ilimanarneruvoq.

Tuluit Ruslandimi suliffeqarfeqartut eqqugaanissaat maanna ilimagineqalerpoq, Tuluillu uuliasioqatigiiffissuat British Petroleum eqqorneqarsinnaalissagunartoq oqaatigineqarpoq.