Tuluit sakkutuutik angerlakaatinniarpaat

Tuluit ministeriunerata Tony Blair-ip ullumi avammut tusarliunniarpaa tuluit sakkutuuisa 1000-ilikkaat maanna Irak-imiittut angerlakaatinneqartussanngornerannut pilersaarutertik, taama tuluit aviisii arlallit allaaserinnipput.

Tusagassiorfiit oqaluttuaat naapertorlugit Tony Blair-ip pilersaarutini tuluit inatsisartuinut sapaatip akunnikkaartumik saqqummiuttassavaa inatsisartullu sunilluunniit tamanna pillugu apeqquteqarsinnaatitaassapput. Aviisit The Times aammalu The Sun allaaseraat Tuluit Nunaata siullermeerluni sakkutuunik angerlartitsileruni sakkutuut Irak-imiittut 1500-t sapaatip-akunnialuit qaangiuppata angerlartereersimassavai.

Amerikami præsidentip illorsuani Det Hvide Husimi oqaaseqartartup Gordon Johndroe-ip ippassaq uppernarsarpaa, Tony Blairip Amerikamiut præsidentiannut George W. Bushimut tuluit sakkutuuisa angerlakaatinneqarnissaat pillugu pilersaarunni ilisimatitsissutigereersimagaa.

Tony Blairi taama tusarliussivoq USA´p præsidentia qanittukkut tusarliussereersorlu Amerikamiut sakkutuui Irakiliartitassat 21.500-nik ilaneqassasut, taamaalilluni Bagdadi ipitinneqarsinnaaqqullugu.

Tuluit Nunaat Irak-imiittuutiminik 7100-nik sakkutooqarpoq, taakkulu amerlanersaat Irakip illoqarfiisa annersaata tulliani Basramiitinneqarput.