Tuluit sakkutuui Iran-imiut TV-atigut takutinneqarput

Tuluit sakkutuui imarsiortut 15-it, Iranimiunit tigusaasimasut, unnummut Iranimi tv-kkut takutinneqarput. Sakkutuut ilaat tv-kkut aallakaatinneqartumi oqarpoq Iranip imartaanut iserfigeqqusaanngitsumut pisimallutik.

- Killeqarfik qaangertoorsimagunaratsigu, sakkutooq arnaq 26-nik ukiulik tv-kkut aallakaatitami oqarpoq.

Aallakaatitami aammattaaq arnap taassuma ilaquttaminut allagarisimagunagai takutinneqarput.

- Taama pisoqarsimannginnissaa kissaatigigaluarpara, tassami taama pisoqarsimanngitsuuppat maanna angerlarsimassagaluarama, pappilissami assaannarmik allatani taama allassimasoqarpoq.

Aallakaatitami arnaq taanna nasartaaserneqarsimavoq nujai isertorniarlugit oqaatigaalu sakkutooqatinilu ajunngitsumik pineqarlutik. Aallakaatitami inimi issiatillugit nerisut takutinneqarput.

Sakkutuunit imarsiortunit 15-iusunit arnaq taanna kisimi oqaaseqartinneqarpoq.

Tuluit nunanut allanut ministereqarfiannit sakkutuut Iranimiut tv-atigut takutinneqarnerat “akuerineqarsinnaanngilluinnartutut” oqaatigineqarpoq aammattaaq sakkutuut imarsiortut Iranip imartaaniitillugit tallimanngormat tigusarineqarsimanerat uppernarsarneqarpoq.