Tuluit sakkutuui 7.500-t angerlassapput

Qaammatit tulliuttut qulit ingerlaneranni Tuluit sakkutuumik Irakimiittut affangajaat angerlarartinniarpaat. Maanna Tuluit Nunaat sakkutuunik 7.500-nik Irakimiititaqarpoq.

Tony Blairip sakkutuut 1.000-it imaluunniit 1.500-t angerlarartinneqarnissaat maajimi inatsisartunut ilisimatitsissutigissagaa naatsorsuutigineqarpoq. Aamma juullertinnagu sakkutuut affaasa missaat 3.000-iusut imaluunniit 3.500-uusut angerlartinniarneqarput. Unnia Tony Blairip Amerikamiut præsidentiat Bush qanittukkut sivisuumik oqaloqatigisimagaa, taamaattumik angerlarartitsinissap USA peqatigalugu aaqqissuunneqarsimanissaa qularutissaanngilaq. Kisianni Amerikamiorpassuit qularnanngitsumik eqqarsassapput, nunat suleqatigisatik sakkutuuminnik angerlarartitsileruttortut sooq namminneq sakkutuutik Irakimiittut 20.000-inik ilaneqassanersut.

Kisianni Basra Tuluit sakkutuuinit akisussaaffigineqartoq annerusumik shia-muslimeqarfiuvoq taamalu Bagdadimiit ajornartorsiornannginnerulluni. Taamaalilluni sakkutuut angerlarartinneqarnissaannik kissaateqartut kissaataat naammassiniarneqarsinnaalerpoq. Taamatuttaaq nunat Irakimi suleqatigiittut, Irakip kujataani iluatsitsinertik avammut nittarsaassinnaassavaat, taamalu sorsunnermi ajorsarsimannginnertik takutillugu.