Tuluit nutaanik suli naalakkersuisoqalinngillat

Tuluit Nunaanni naalakkersuisunngortitsinissamut tunngavissat pillugit Konservativit aamma Liberaldemokratit sapaatip-akunnerata naanerani isumaqatigiinniarput, isumaqatigiinniarnerillu ullumi nangeqqinneqarlutik.
maajip 10-at 2010 11:14

Konservativinit oqaaseqartartoq BBC-mut oqarpoq oqaloqatigiinnerit pissarsiviulluartumik ataqqeqatigiinnerullu anersaavani ingerlanneqartut, taakkuali qanorpiaq imaqarnerat oqaatiginagu.

Gordon Brown ministeriunertut suli atuuppoq taassumalu Nick Clegg naalakkersuinikkut suleqatiginissaanik neqeroorfigalugu, tassa Konservativit aamma Liberaldemokratit isumaqatigiinniarnerat iluatsinngitsuussappat.

Sapaatiummat ulloqeqqaraa partiit illuatungiliuttunit marluusunit isumaqatiginninniartitat naalakkersuinikkut tunngavissat pillugit isumaqatiginninniarnissat erseqqinnerusut pillugit ataatsimiipput.

"Silaannaq" pitsaasutut oqaatigineqarpoq isumaqatigiinniarnerillu "pissarsiviulluartut" partiinit marluusunit oqaaseqartitat tamarmik taama oqarput.

Siunertarineqarpoq naalakkersuisoqatigiit pilersinneqarnissaat imaluunniit Konservativinik ikinnerussuteqarluni naalakkersuisoqateqarneq Liberaldemokratinit tapersersorneqartumik. Partiit marluullutik isumaqatigiinniarnitik nukingiukkumanagit erseqqissarpaat aammalu peqqissaarnissaq pingaaruteqartoq erseqqissarlugu.

Tuluit Nunaanni 1974-ip kingornagut aatsaat partii ataasiinnaq amerlanerussuteqarnissamini ajorsarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq