Tuluit Nunaata qeqertaq annaalerpaa
Qeqertaq aamma Forvik-imik taaneqartartoq taamaallaat hektaritut ataatsitut angitigaaq sanaartorfigineqarsimananilu. Tululli utoqqalinersialik Stuart Hill qeqertaaginerakkamini qaarsuinnaat anorlernikkaat pillugit pilersaaruterpassuaqarpoq. Forvik tassaassaaq Shetlandit qeqertaasa Tuluit Nunaannit avissaarniarnerannik suliap ingerlanerani aserorterisuusussaq, taama neriuppoq 65-inik ukiulik Hill. Tappavani nutaarsiassaqarfik naapertorlugu avissaarniarneq qanittukkut pisussaavoq.
- Maanga tikinnerma kinguninnguagut qeqertat naalakkersuinikkut aaqqissuussaanerat ilisimatusarfigalugu aallartippunga. Tamanna Shetlandimiut soqutigisarinngilaat. Neriuutigaarali taakkua pitsaaqutissat takulerunikkik soqutiginnilerumaartut. Massakkut iliuuseriniagara Shetlandimut maligassiuussisuusinnaavoq, taanna aviisimut The Shetland News-imut oqarpoq.
Hill tupermi marluuttarissami najugaqarpoq, maannakkulli 25 kvadratmeterisut angitigisumik illuaraliulerluni. Taanna oqaluttuarpoq qeqertap namminersortuunini pissutigalugu immikkut aningaasaqartariaqartoq, tamaani akileraaruteqassanngilaq momseqaraniluunniit, Forvik-ilu EU-mi ilaasortanngussanani.