Tuluit Nunaat ministeriunertaarpoq
Tuluit Nunaat ullumi ministeriunertaarpoq. Tony Blair ukiut qulit sulereerluni taamaatippoq, amerlaqisullu ilimagaat inatsisartuni inini aammattaaq taamaatikkumaaraa. Tuluit aningaasarsiornermut ministerertaavat tassaavoq Gordon Brown.
Gordon Brown Labourpartiip nutaamik ilaasortaraa pikkorissoq. Tony Blair eqqaassanngikkaanni naalakkersuinermi atorfik taanna kisiartaalluni ukiut qulit ingerlaneranni aalajangiusimasimavaa. Partiimi assorsuaq pissaaneqarpoq, partiimilu siulittaasunngornissani, pingaartumillu ministeriuninngornissani, naammagittaalluni utaqqisimallugu. Ministerit nikinnissaat erniinnarluinnaq sulissutiginiarpaa, aningaasaqarnermummi ministeri siullermik atorfissaqartippaa, ilimanarporlu tassaassasoq maannamut niuernermut suliffissuaqarnermullu ministeri, Alistair Downing. Atorfillu imaannaanngitsoq alla aamma inuttalerneqartussaavoq, nunallu iluani pissutsinut ministeri, John Reed, oqareersimavoq Tony Blairip tunuarnera peqatigalugu tunuarumaarluni. Gordon Brownip nalunaarutigaa nammineq naalakkersuisuni tamanut piginnaassusilinnik inuttaqassasoq, ilimagineqarporlu ministerit suliaqarfii suli arlallit aqagu agguataarneqassasut. Naalakkersuisut eqqummaarillutik sassassapput, aallartiffillu nutaaq kalerriullugu. Tony Blair eqqarsaatigalugu, taassuma inatsisartuni ilaasortaanini taamaatillugu, Tuluit Nunaanni naalakkersuinermit tunuavilluni tunuarnini taamaalilluni kalerriunniarlugit, Tuluit Nunaata avannaani qinersisartumi najugaat tikeraassaga ilimagineqarpoq.
Tuluit aviisiat The Guardian nittartakkamini ualimut allappoq, Tony Blair Kangiani Qiterlermi eqqissisitsiniaalluni akunnermiliuttutut toqqarneqarsimasoq. Tappavani nunanik sisamaagajuttunik taaneqartunut, tassalu Naalagaaffiit Peqatigiinnut, EU-mut, USA-mut Ruslandimullu sinniisuussaaq.
