Tuluit nunaanni sisamanngorpat qinersinissaq pissanganarniarpasippoq
Tuluit nunaani ministeriunerup David Cameronip qinersisartut sillimaqquai Konservativit sisamanngorpat qinerneqanngitsoorpata, Labourip siuttua, Ed Milibandip ministeriunerup illuanut Downing Street 10-miittumut matuersaatit tigussagai.
- Naggataatigummi inuit marluk akornanni ataaseq kisimi ministeriuninngussaaq normu 10-mullu isersinaalissalluni, ullaaq manna David Cameroun tuluit nutaarsiassaqartitsivianut taama oqarpoq.
Skotlandermiunut nunaminnik pingaartitsisunut suleqatigiinneq
Cameronip labourip skotlandermiut nunaminnik pingaartitsisut partiiat SNP, labourikkunnit saamerlermi inississimasut naalakkersuisooqatigiilernissamut naammattunik isertitaqassagunik suleqatigisariaqalernissai ulluni kingullerpaani ukkatarai.
Taamaliornerata Ed Milibandip sanngiiffii eqqorpai, taassuma Cameronimut akerliliilluni saassussivoq isumaqarami nunamut tunngasunut apeqqutinut qiterpasissunut avaqqutserujussuarnerarlugu.
Taakkunani pineqarput, aningaasaqarneq, nunasiartorneq peqqinnissaqarfillu, Labourip siuttua aviisimit The Guardianimit apersorneqarnermini oqarpoq.
Naligiittorujussuussasut
Arfininngormat qinersisartut isumaannik misissuititsinermi saqqummersumi Labourikkut det konservative partiimit procentimik ataatsimik siuaqqapput, 34 procentinit tapersersorneqaramik partiillu aappaa 33 procentinik tapersersorneqartut.
Naliliinerup eqquinngitsoorsinnaanera 3 procentiuvoq, taanna isumaqarluni partiit angisuut marluk naligiittorujussuusut.
