Tuluit Nunaanni qineqqusaartut unammivissorput
Ulloq qinersivissaq sioqqutitsiarlugu suli paasinarsisoqanngilaq. David Cameronip partiia Konservativiusoq isumasiuinerit kingullerpaat najoqqutaralugit Labourimit Liberaldemokratinillu 5 procentit tikillugit siuaqqavoq tamannali amerlanerussuteqartunik naalakkersuisunngortitsinissamut naammagani.
Taamaattorli David Cameronop nammineq naalakkersussami Tuluit Nunaanni naalagaaffiup amigartooruterparujussuisa iliuuseqarfiginiarai ullumi saqqummiilluni, tamannali Liberaldemokratiniittup Nick Cleggip erniinnaq akerlilerlugu:
- David Cameron Downing Streetip saaguinik uuttortaalereerpoq, nammineq Tuluit Nunaannut pilersaarutini suunersut pillugit oqaluttuuppaasi, ilissili oqaluttuartussaavusi uatsinni sorleq piumanerunerlugu, Cameronilu qilanaarpallaalereersimavoq, Nick Clegg oqarpoq.
Cameronili taamatulli akilloritsigaluni akissuteqarpoq:
- Ajugaanissara taama qularinngitsigisuugukku qinersinissap tungaanut qineqqusaarnera ingerlassimassanngikkaluarpara, qinersisartulli ajugaassagutta qanoq iliorniarnerput ilisimasariaqarpaat, Koservativit pisortaat oqarpoq.
Ullumikkut qinersisoqartuuppat Liberaldemokratineersoq Nick Clegg kia ministeriunertut qinigaanissaanut aalajangiisuussaaq, taavalu Konservativit Labourilu illuatungiliuttutut naalakkersuisunik pilersitsiniarnertik oqaluuseralugu. Kikkulli inuttaassanersut eqqarsaatigineqassaaq, tusarfiillu Danmarks Radiop oqaluussai oqarlutik Nick Clegg Liberaldemokratineersoq Labour naalakkersuisooqatigalugu ministeriuninngorumaartoq.
