Tuluit Nunaanni pinerliiniarfigitinnissaq ernumanarpallaanngilaq
Sooq maannarpiaq ajortumeeriarneqarnissamik aarlerinaatip millisimanera Tuluit apeqquserpaat.
Pinerliiniat saassussinissaasa aarlerinaataat qaffasissutsinut tallimanut Tuluit inissitsiterisarput. Siornatigut saassussinissaq erloqinartutut ilimanaateqarluartutullu inissisimariarluni maanna tigussaasumik periarfissaalluartumut apparpoq. Allatut oqaatigalugu Tuluit Nunaata qanoq isumannaatsiginera oqaatigiuminaappoq. Tuluit Nunaanni nunami namminermi pissutsinut ministerip Allan Johnsonip ullumi erseqqissarpaa saassussinissamut aarlerinaatip ilungersornartumik suli inissisimammat sillimaniarnerullu appartinneqarnianngimmat ilanngullugu oqaatigaa, taamalu Al Qaidamit Irlandillu avannaani aninguisitsiniaqatigiinnit pinerliiniarnissaq suli aarlerinartoq. Taamaalilluta apeqqummut uteqqippugut, tassalu sooq saassunneqarnissamik aarlerinaatip paasiniaasartunik appartinneqarnera sumik tunngaveqarpa? Tuluit immikkut ilisimasallit isumaqarput Tuluit Nunaanni isertortumik paasiniaasartut amerlanernik aningaasanik atugassaqartinneqalersimasut taamaalillutillu saassussiniarnerigaluit pinngitsoortinniarlugit pikkorinnerulersimasut, allalli isumaqarput Tuluit sakkutuui Afghanistanimi toqutaasartorpassuit akuersaartinniarlugit namminneq nunaminni ulorianartorsiunnginnerulernertik takutinniaraat.
