Tuluit Nunaanni imigassaq akitsoqquaat
Tassami nunani arlalinni imigassanik akitsuiniartoqalerpoq – soorlu Tuluit Nunaanni immiaaqqat, viinnit imigassallu akitsungaatsiarnissaat naalakkersuisunut innersuussutigineqarpoq. Taama siunnersuuteqartuullutik tuluit isumalioqqissaartitaat, tassa tuluit peqqissusaannik misissuereerlutik taama siunnersuuteqarput.
Taakkua inerniliinerat paatsuugassaanngilaq: Imigassap peqqinnissamut akornutaaneranik paasisitsiniaanerit sunniuteqarneq ajorput. Taamaattumik naalagaaffik iliuuseqartariaqarpoq akillu qaffallugit.
Isumalioqatigiissitat arlaannaannulluunniit attuumassuteqanngitsut taaguuteqartut Nuffield Council on Bioethics, imigassap peqqissutsimut aningaasarsiornikkullu ajornartorsiutaanera misissuiffigisimavaat.
Isumalioqatigiissitap siulittaasua Lord Krebs isumaqarpoq imigassaq pillugu paasisitsiniaanerit naammanngitsut.
- Innuttaasut peqqissuunissaat naalagaaffiup pisussaaffigaa tamatumalu kingunerisinnaavaa toqqarsinnaasatta killilerneqarnerat, Lord Krebs oqarpoq.
Isumalioqatigiissitap siunnersuutigaa, imigassamut akitsuutit qaffanneqassasut pissarsiarisinnaanissallu ajornakusoornerulissasoq.
