Tuluit Nunaanni illut eqqaanni pujortarneq inerteqqutaalissaaq
Tuluit Nunaanni imerniartarfinni pujortartarneq inerteqqutaalereerpoq, immaqalu aamma illit inissiavit majuartarfeqarfiini pujortartarunnaassallutit. Peqqissaanikkut pilersaarummi Tuluit Nunaanni pujortartartut affaannanngortinniarneqarput. Ullumikkut tuluit 21 procentii pujortartarput ukiullu tulliit qulit ingerlaneranni taakkua 10 procentinngortinniarneqarlutik. Cigaretteerniarfiit aningaasanik nakkartitsilluni pisiniarfigineqarsinnaasut cigarettit poortorneqartarnerisa illuutillu isaariaanni pujortartarnerup inerteqqutaalernissaat pilersaarummut ilaapput. Tuluit Nunaanni ukiumut inuit 80.000-it pujortartarnerup kinguneranik toqusarput, taakkualu inuiaqatigiinnut 23 mia. koruuninik naleqartarlutik. Tuluit Nunaanni tupatortartut ukiuni kingullerni qulini 15 procentimik ikileriarsimagaluarput ilaatigut naalakkersuinermik suliallit siunnerfiat sukannersoq pissutaalluni. Pujortartarneq pillugu annertuumik paasisitsiniaasoqartarpoq, pujortartarnerlu pillugu inatsit kingullermik 2007-imi sukannernerulersinneqarmat illuutini kikkunnilluunniit orninneqartartuni suliffinnilu tamani pujortartarneq tamarmi inerteqqutaalersinneqarluni. Taamaaliornerlu siornaannarmi pujortartartut 337.000-inik ikeriarnerannik kinguneqarpoq. Tuluit peqatigiiffiat Forest pujortarnissamut pisinnaatitaanermik sorsuutiginnittoq BBC-mut oqarpoq malittarisassani nutaani inuit qanoq inooriaaseqarnissaminnik aalajangersinnaanerminnik suli ataasiarlutik piiaaffigineqartut, tamannalu imerniartarfinniittartut qularnanngitsumik isumaqatigissavaat.
