Tuluit Nunaanni aviisit ilaat imminnut pisaripput

Andy Coulsonip ministeriunerup tusagassiutinut siunnersortaatut nutaatut atorfinitsinneqarnera akerlerineqaqaaq. Coulsonimi Tuluit Nunaanni aviisimi tusaamanerlugaaqisumi nuannarineqanngeqisumilu, News of the Worldimi, siusinnerusukkut aaqqissuisuunerusimavoq.

Aviisiliortut ilaata oqaluttuassarsiorluni kunngissap Charlesip ernerisa, prins Williamip aamma Harry-p, qarasaasiaanni programmiannut unioqqutitsilluni pulasimanini, oqarasuaataannillu unioqqutitsilluni tusarnaartarsimanini, pissutigalugit, parnaarussaammat, politikerip isumaanik inunnut akueriuminarsaasup, tassa spindoktorip, aviisi 2007-imi qimappaa.

Aviisiliortup unioqqutitsilluni paasisassarsiortarsimanera taamanikkut, maannaluni, Andy Coulsonip ilisimasaqarfiginngilluinnarnerarpaa. Tamannali inuppassuarnit upperiumaneqanngilaq. David Cameronimullu siunnersortinngormat aviisit The Guardian aamma New York Times qaqilerilerput.

Aviisit paasisaminnik saqqummiussimmata Andy Coulson atorfimminit tallimanngormat tunuarpoq.

Eqqartuussissuserisoq Mark Lewis oqaluttuarpoq, aviisiliortut inuit allat oqarasuaataannik unioqqutitsillutik tusarnaartartut, allanillu aamma unioqqutitsisartut, eqqartuussisulersuussiniartut sullittarini.

Ministeriunerusimasut, Tony Blair aamma Gordon Brown unioqqutitsisumik tusarnaarneqartarsimanerlutik misissuisitsiniarput.

Eqqartuussissuserisoq Mark Lewis nutaarsiassaqartitsivimmut Sky Newsimut oqarpoq suleriaaseq una siaruaassimasoq.

Taamalu naliliinera ministeriunerusimasup Tony Blairip siunnersortaanit, Allister Campbellimit, isumaqatigineqarpoq.