Tuluit ministeriunerata Gordon Brownip Mugabe ilaluaraa

Tuluit ministeriunerat Gordon Brown EU-p Afrika pillugu ataatsimeersuartitsinissaanut peqataarusunngilaq. Zimbabwep, præsidentia, Robert Mugabe, Gordon Brownip inimi isiaqatigerusunngilluinnarpaa.

Gordon Brown, nammineq isumaqarpoq, kisermaassilluni naalakkersuisuusup Zimbabwe samugarsuaq Mugabep nakkaatsissimagaa;

Nunarsuarmiut tamarmik nilliasariaqarput iliuuseqarlutillu, Gordon Brown, oqarpoq.

Qaammaterpassuarmi nunat allamiut tusagassiortui Zimbabwemut iseqqusaasimanngillat, tuluit TV-kkut aallakaatitassiortartui Zimbabwemi assileeqqammerput, nalunaarusiaallu amiilaarnaqaat.

Nuna piitsuuginnanngilaq, suliffissaaleqisut 80 procentiupput, Mugabep naasorissaasut qaamasunik amillit nunamit anisissimavai.

Nunaatillu naasorissaasunut qernertormiunut agguaassimallugit, Gordon Brown oqarpoq, nangipporlu tamatuma kinguneraa, narsaatit naggorinnikooqisut innuttaasunut naammattumik nerisassaqartitsiunnaarput.

Gordon Brownip pissusissamisoorsorinngilaa, 83-inik ukiullip Robert Mugabep, Portugalimi EU-p Afrika pillugu decemberimi ataatsimeersuartitsinissaanut qaaqqusaanissaa.

Gordon Brownip oqaatigaa piumasani pinngikkuniuk nammineq ataatsimeersuartunut peqataaniarani.

- EU-p nammineq aalajangiinnassavaa Mugabe uangaluunniit qaaqqussanerlugu, Gordon Brown oqarpoq.

Zimbabwe 1980-ip tungaanut tuluit nunasiaatigivaat taamanikkut nuna Rhodesiamik taaguuteqarpoq.

Mugabep politikkikkut partiiata tusagassiutit tamaasa aqutarigamigit ajornanngitsuararsuamik oqaatigiinnariaavaa, tuluit afrikami naalagaajumallutik pissusilersoqqilersut.