Tuluit meerartaat 2 millionit suliffissaaleqisunik angajoqqaaqarput
Nalunaarusiaq nutaaq malillugu, Tuluit Nunaanni inoqutigiit sulisortaqanngitsut amerlavallaarujussualersimapput. Inoqutigiit arfiniliugaangata ataatsit suliffeqanngitsuusarput. Kisitsillu taanna Tuluit Nunaata avannaani Skotlandimilu qaffasinneruvoq, taakku nunarsuarmi aningaasaqarnikkut ajornartorsiornermit sakkortuumik eqqugaammata.
- Uanga meeqqanik uumasunilluunniit sullisserusukkaluarpunga, suliffissarsiuussisarfimmulli saaffiginnikkaluaraangama pissaqartinneq ajorpaannga, 43-nik ukiulik Susan Glasgowimeersoq oqarpoq.
Susan pissakinnernut suliffissaqanngilluinnartunut amerliartuinnartunut ilaavoq. Suliffissaaleqisut Tuluit Nunaanni ima amerlitigilerput, allaat naalakkersuutitalinnut Labour-imut illuatungiliuttut maanna sakkortuumik iliuuseqaqqusilerlutik. Liberalit oqarput maannangaaq iliuuseqartoqanngippat ilaqutariit 100.000-it inuiaqatigiinni ikiornissaanut akissaqarfigineqaratik katataalluinnassasut. Konservativillu uparuaanerminni ilaqutariit pissakilliortut meerartaat inuusuttortaallu ikiorserneqanngikkunik atukkamikkut kingunerlutsitsisinnaanerat eqqaavaat.
Suliffissaqarnermut ministeri Kim Knight oqaraluarpoq naalakkersuisut suliffissaqartitsinissamut 50 milliardi koruunit nalinginik immikkoortitsereersut. Taamaakkaluartoq pingaartumik inuusuttut suliffissaaleqinermik eqqugaasut amerlagallarnissaat nassuerutigaat.
- Suliffissannik iluatsitserusukkaluaqaanga, 18-inik ukiulik David NewCastlemeersoq oqarpoq. Suliffik sunaagaluartorluunnit suliffigisinnaagaluarpara, ksianni uattut ittut, inuusuttut, suliffissaqartinneqanngillat, oqarpoq. Kisimiinngilarlumi.
Inuusuttut 1 millionit suliffissaaleqipput meeqqallu 2 millionit ilaqutariinni suliffeqanngitsuni najugaqarlutik, uffa Tuluit Nunaata Aningaasaqarnikkut ajornartorsiorneq qaangereeraa pisortatigut nalunaarutigineqareeraluartoq. Allaammi illut akii qaffariartoqqilereerput, taamaakkaluartoq, suliffissaaleqisut siunissami qaninnermi neriuutissaqanngitsut eqqugaanerpaapput.
Tuluit Nunaanni suliffeqarfissuit ilaat fjernsyniliorfissuaq Toshiba Plymouth ullumi matummat inuit 270-t suliffissaarupput.
