Tuluit maaji qinersinissaat pissangassutaalereerpoq
- Qaammat ataaserpiaq qaangiuppat qinersisoqassaaq ullumikkullu isumasiuinerit assigiinngilluinnartut marluupput, ataatsip Konservativit procentinik qulersuarnik siuariassangatippai taavalu ataatsip Guardian 4 procentimik siuariassangatillugu, 4 procentimillu siuariarnissaq naalakkersuisunngortitsinissamut naammassagunarani, taamaammat qinersinissaq Konservativit qitiutillugit ammasorujussuussaaq, kisiannili qanorluunniit pisoqarsinnaalluni, Jakob Ildeborg oqarpoq.
Qinersinissami sammineqartut suut pingaarnerunersut Jakob Ildeborg aperineqarami akivoq, isumaqarluni aningaasarsiorneq sammineqarnerujumaartoq.
- Labourip aningaasarsiorneq sammiumavaa, tassami Tuluit Nunaanni aningaasarsiorneq siuariartorsorinarmat. Konservativit aamma aningaasarsiorneq sammiumavaat, oqarlutilli Labourip aningaasarsiorneq siullermik ajornerulersilluinnarsimagaa, aammalu oqarlutik Labour nutaamik eqqarsarnermik tunniussiumaartoq. Kisiannili aamma politikerinik tatiginnissuseqarneq pineqarpoq. Politikerit naalakkersuisullu taakkua arlaleriarlutik assuarnartuliortarsimasut ilumut inunnit tatigineqarnerlutik, isumaqarpungalu qinersineq taakkunannga sunnerneqarumaartoq, Jakob Ildeborg oqarpoq.
Assuarnartuliornerit suut aalajangiisuujumaarnersut Jakob Ildeborg aperineqarami akivoq:
- Oqarumavunga aningaasartuutit pillugit siorna assuarnartuliorneq aalajangiisuujumaartoq, assuarnartuliornerillu imaaginnavissimallutik, allaat sap. akunnerini kingullerni marlunni pisimallutik, isumaqarpungalu partiit angisoorsuit qinersisussarpassuarnit qinissanerlugit qinissannginnerlugilluunniit eqqarsaatigineqarumaartut akerleriniarneqarlutilluunniit, soorlu partiit qorsuit allalu liberaldemokratit minnerulaartut tamatumani aalajangiisuullutik inissisimalerumaartut, aamma imaaratarsinnaalluarpoq qinersisut ikittuararsuussasut, inuit qinersinissamut naaggaarlutik, illuatungaatigulli qinersineq taanna immikkorluinnaq ittuussagunartoq isumaqarpunga, imaalluarsinnaavorlu qinersisut aamma amerlasoorujussuussasut, tamannali naluarput, DR allaaserinnippoq.
