Tuluit kilisaataat unioqqutitsilluni aalisartoq

Piffissami nutaanerusumi aatsaat taama amerlatigisunik nunatsinni akiligassiisoqartoq, nutaarsiassaqartitsivik Ritzau nalunaarpoq.

Tuluit aalisartitseqatigiiffiat Onward Fishing Company marlunngormat unioqqutitsilluni aalisaleruttortoq Kangilinnguani Sakkutooqarfiup nakkutilliissutaanit Hvidbjørnimit tigusarineqarpoq.

Nakkutilliisut umiarsuup Marbellap saarulliit 148 tonsit pisarisimasai nassaaraat.

Umiarsuaq aalisariut qaleralinniarnissamut akuersissuteqarpoq saarullinniarnissamulli akuersissuteqarani, taamaattumillu unioqqutitsilluni aalisarnini nassuerutigaa unnerluussullu atsiorsimallugu. Aalisartitseqatigiilli eqqartuussisulersuussinissaq piumasaraat.

1,8 million koruuninik akiligassiisoqarpoq, taakkua pisanut unioqqutitsillunilu aalisarnermut akiligassiissutaapput.