Tuluit inatsisartui atorunnaarallartinneqartut

Tuluit Nunaanni ministeriunerup Boris Johnsonip oqaaseqartitaata tamanna ullumi uppernarsarpaa.

Tuluit inatsisartuisa atorunnaarallartinneqarnissaanut Boris Johnson dronningimit piginnaatitaassummik pissarsereerpoq, sapaatip-akunnerata massuma ingerlanerani ataasinngornermi sisamanngornerup tungaanut atorunnaarsinneqarallarnissaannut piginnaatitsissummik pissarsereerluni.

Tuluit Nunaata EU-mi ilaasortaajunnaarnissaanut ulloq killigititap kinguarteqqinneqarnissaa tuluit naalakkersuisuisa EU-mut kissaatiginianngikkaat, ministeriunerup oqaaseqartitaata erseqqissaatigaa.

AAMMA ATUARUK Ilisimatooq: Overhuset brexitimut inatsit pillugu piffissaarutilerpoq

Tuluit EU-mi ilaasortaajunnaarnissaasa kinguartinneqarnissaa Boris Johnson tuluit inatsisartuisa aappaanni Underhusimi inatsisissatut siunnersuutitigut pisussaaffilerneqaraluarpoq. Inatsisissatut siunnersuutip taassuma Underhusimi ullumi taasissutigineqarnissaa naatsorsuutigineqarpoq, tuluilli EU-mik isumaqatigiiissusioqqaarsinnaanissaat matumani apeqqutaassaaq.

Tuluit EU-mik isumaqatigiissusioqqaaratik EU-mi ilaasortaajunnaarnissaat Johsonip iluatsissaguniuk inatsisartuni amerlanerussuteqartunit akuerineqaqqaartariaqassaaq.

Tuluit Nunaanni inatsisartunut qinersisoqarnissaanut siunnersuut Boris Johnsonip inatsisartuni ullumi saqqummiunniarpaa. Siunnersuut Underhusimi ilaasortat akornanni 2/3-deliisa akuereqqaartariaqassavaat.

Inatsisartunut qinersisoqarnissaanut siunnersuut illuatungiliuttunit itigartitsissutigineqarumaartoq naatsorsuutigineqarpoq.