Tuluit iliuusaat USA-mi demokraatit ilaarusuppaat

Tuluit Nunaata sakkutuuminik Irak-imiittunik angerlarartitsinialernera atorluarlugu USA-mi partiit demokraatit maanna peqqutissarsiulerput.

USA-mi demokraatit ippassaq præsident George W. Bushimut piumasaraat Tuluit Nunaata ministeriunerata iliuusaa USA-p malittariaqaraa taamalu Amerikamiut sakkutuui angerlarartillugit.

Amerikap naalagaaffiata amerlanerussuteqartunit qinerneqarsimalluni siuttuusup Harry Reidip toqqaannartumik oqaatigaa, Tuluit Nunaata piviusut nassuerutigisimagai akerlianik Amerikami præsidentip piviusut tamakku takunaveersaarlugit nassuerutiginaveersaarai taamalu sakkutoorpassuit 1000-likkaat Irak-iliartinniarsaralugit.

- Taamaaliorluni ajornartorsiut qaangerneqarsinnaanngilaq, Harry Reid ilaatigut taama oqarpoq.

Taama oqartoqarnerata kingorna USA-p præsidentiata illorsuanit Det Hvide Husimit tutsiupput Harry Reidtip oqaasiisa ilaat akuersaanngikkitik. Taamalu Tony Blairip iliuusaa nutaaliorluni sakkutuunik immikkoortiterinertut taallugu.

Amerikami Innuttaasut sinnerlugit sinniisoqarfimmi siulittaasuusup Nancy Pelosip paaserusuppaattaaq sooq Amerikap sakkutuut taamannat 1000-likkaat Irakiliartinnialersaarnerai akerlianillu tuluit sakkutuumik angerlarartinneqarnissaat

maanna pilersaarutigigaat.

Taamatuttaaq USAp nunanut allanut ministeriata Condoleezza Ricep akuersaanngilaa Tuluit USA-llu iligiinnerata maanna ajortikkiartulerneranik oqaluttoqarnera. Taassumattaaq erseqqissarpaa Irakip kujataani tuluit sakkutoorpassui 1000-likkaat Irakip kujataaniitinneqarallassammata.

Tuluit sakkutuutik 7100-t qaammatialuit qaangiuppata angerlarartinniarpaat aammalu Danmarkip sakkutuutik 400-t aggustimiit angerlarartinniarlugit.