Tuluit EU-mit aninissaat kinguarteqqinneqartoq

Nunat EU-mi ilaasortat tuluit EU-mit aninissaata 2020-mi januaarip 31-anut kinguarteqqinnissaanut akuersereersullu tamanna paasinarsivoq. EU-p præsidentia Donald Tusk Twitterikkut taama allappoq.

- Ilimagaarput aalajangernerat allaganngorlugu malittarisalittut aaqqissuunneqassasoq, EU-p præsidentia oqarpoq.

Piffissaliussarli allanngortinneqarataannaavoq. Tassa imaappoq, tuluit EU-mit aninissaat pillugu isumaqatigiissuut inaarutaasumik akuerineqassappat EU-mit piffissaliussaq sioqqullugu anisinnaassapput.

Tuluit Nunaata ministeriunera, Boris Johnson, tuluit EU-mit aninissaata kinguartinneqarnissaanut pinaaserluni sapaatit akunnerani kingullermi qinnuteqarpoq. Tuluit inatsisartui ministeriunerup piffissaliussaanut tapersiinngimmata taama iliortariaqarsimavoq.

Tuluit EU-mit aninissaat pingajussaanik kinguartinneqarpoq. EU-mimmi suleqateqarnertik ukioq manna marsip 29-ani taamaatittussaagaluarpaat.

AAMMA ATUARUK Boris Johnson decembarimi nutaamik qinersititsiniartoq

Apriilip ulluisa aqqaneq-aappaanni siullermik kinguartinneqarpoq. Tuluit Nunaanni ministeriunerusimasoq, Theresa May, isumaqatigiinniutigisaminut tapersersuisussaaleqimmat tamanna pivoq.

Johnsonip aallaqqaataaniit isumaqatigiinniutaasup annerpaartaa allanngortippaa, taannali inaarutaasumik aamma akuerineqanngilaq. Tuluillu aaqqiissuteqarnissaminnut qaammatinik pingasunik periarfissinneqaqqipput.

Ministeriuneq tuluit inatsisartuinik decemberip ulluisa aqqaneq-aappaanni qinersisitsisoqarnissaanut ullumi ataasinngornermi ualikkut tapersersortissarsiorpoq.

Johnsonip qinersisitsisoqarnissaanut siunnersuutini maanna pingajussaanik akueritinniarsaraa, sulili iluatsinngitsumik.

Ullumikkut ataasinngornermi iluatsissappat tuluit inatsisartuisa 66 procentiisa tapersiisimanissaat pisariaqarpoq.

Tuluit nutaarsiassaqartitsiviat Press Association naapertorlugu tuluit partiivisa naalakkersuisunut illuatungiliuttut annersaat, Labour, siunnersuummut maannamut tapersiinngitttuarsinnarput.

Tamannali decemberimi qinersisitsisoqarnissaata qulakkeerneqarnissaanut periarfissatuaanngilaq.

Demokraatit killilersuerusunngitsut Skotlandimiullu partiiat SNP siunnersuutigaat decembarip ulluisa qulingiluaanni qinersisitsisoqassasoq - tuluit EU-mit aninissaat januaarip naaneranut kinguartinneqarnissaa EU-mit akuerineqassappat.