Boris Johnson decembarimi nutaamik qinersititsiniartoq
Tuluit ministeriunerata, Boris Johnsonip Underhusimi ilaasortat brexitimut isumaqatigiissummik oqallinnerunissaannik periarfissikkusuppai. Taamaallaalli decembarip 12-ianni qinersisoqarnissaanik akuersissappata. Tamanna BBC-mut oqaatigaa.
- Pilersaarummik ajunngivissumik misissuinissaminnut piffissaqarnerorusukkunik piffissaqartinneqassapput, taamaattoqassappalli decembarip 12-ianni qinersisoqarnissaanut akuersissapput. Tamanna ingerlanissamut aqqutissaavoq, Boris Johnson oqarpoq.
Taassuma inatsisartunut qinersinissamut siunnersuut Underhusimut ataasinngorpat qularnanngitsumik saqqummiutissavaa, aviisip The Sunsip politikkimut tunngasunik aaqqissuisua, Tom Newton Dunn Twitterikkut allappoq.
AAMMA ATUARUK Johnson brexit pillugu taasisoqarnerani ajorsartoq
Boris Johnsonip naalakkersuisuutitani sisamanngornermi ataatsimeeqatigai tassani naalakkersuisut alloriarnissaata tullia oqallisigineqartoq, ministeriunerup oqaaseqartartuata nutaarsiassaqartitsivimmut Reutersimut ilisimatitsissutigaa.
Sky Newsip politikkimut tunngasunut aaqqissuisuata naalakkersuisut qinersinissamut siunnersuuteqarniartut aamma tusarpaa.
Siunnersuut tullinnguulluni sapaatip akunnerata aallartinnerani oqallisigineqassasoq, Sky News allappoq.
Boris Johnson Underhuset akuersitinnagu qinersinissamik suaaruteqarusunngitsoq, Reuters allappoq. Ilaasortat pingajorarterutaat siunnersuummut akuersissapput.
Illuatungiliuttut partiiata, Labourip ministeriunerup qinersinissamut kissaateqarnera marloriarluni itigartitsissutigereerpa.
Labourili qinersinissamut itigartitsiniinnassaguni tamanna ”illeqqorinnissamut tatiginanngitsuussasoq” Johnsonip sisamanngornermi oqaatigaa.
AAMMA ATUARUK Brexitimut allannguutissaq akuerineqartoq: Johnson kinguartitseqqinnissamut isumaqatigiissusiortariaqartoq
Tuluillu ministeriunerata ilanngullugu oqaatigaa tuluit EU-mit aninissamut isumaqatigiissuteqarnissaata januaarip 31-annut kinguartinneqarnissaanut EU-p akuerissarpasikkaa.
Johnsonilli novembarip 15-ianut 30-anulluunniit sivikinnerusumik sivitsorneqarnissaa orniginartinnerullugu oqaatigaa.
/ritzau/
