Tuluit eqqartuussisuuneqarfiata inatsisartuni matusineq unioqqutitsineruneraraa

Eqqartuussiviit qullersaanni eqqartuussisut aqqanillit isumaqatigiillutik taama aalajangerput.

- Inatsisartut atorunnaarallartinneqarnissaannut dronningip ministeriunermit innersuunneqarnera inatsisinik unioqqutitsinerusoq eqqartuussiviup inerniliuttariaqarpaa, eqqartuussiviit qullersaata præsidentiata Brenda Halep aalajangiinermut atatillugu oqaatigaa.

Eqqartuussiviup taama aalajangernera politikkikkut alaatsinaattut uissuummissutigaat.

Tuluit inatsisartuisa atorunnaarallartinneqarnerat eqqartuussiviit aalajangiivigisussaanngikkaat, ministerit konservatiivineersut arlallit siusinnnerusukkut oqaatigigaluarpaat.

Eqqartuussiviillu qullersaata aalajangiinera pissutaalluni inatsisartut piaarnerpaamik ataatsimiileqqittariaqartut, inatsisartuni ilaasortat amerlasuut kaammattuutigaat.

- Inatsisartut namminneq aalajangigassaraat - pingaartumik inatsisartut siulittaasuata - maanna aalajangissavaa maanna susoqassanersoq, eqqartuussiviup aalajangiinerani ilaatigut allassimavoq.

Inatsisartut aappaanni Underhusimi ilaasortat piaarnerpaamik ataatsimiittariaqartut, Underhusip siulittaasuata John Bercowip oqaatigaa.

Eqqartuussiviit qullersaata aalajangiinera pissutaalluni ministeriuneq Boris Johnson tunuarniuteqartariaqartoq, partiip illuatungiliuttup Labourip siulittaasuata Jeremy Corbynip piumasaraa.

Eqqartuussiviit qullersaata aalajangiinera ataqqiniarlugu, tuluit naalakkersuisuisa oqaatigereerpaat.