Tuluit aatsitassarsiortut isumalluarput

Tuluit aatsitassarsiornermik ingerlatsiviat Angus and Ross Maamorilimmi “Inngili qernertumi” Zinkimik piiaanermik ingerlatsilernissaminnut suli isumalluarpoq.

Aasaq manna aatsitassat assigiinngitsut 632-t misiliutitut piiarneqartut maanna nalilersorneqareerput.

Siusinnerusukkut Maamorilimmi misissuisoqartareerpoq aasaq mannalu pingajussaanik misissuisoqarluni.

- Soorlu siusinnerusukkut ilisimaneqareersoq taavani piiagassaqarluarpoq, Angus and Ross-imi siulersuisut siulittaasuat Robin Andrews oqarpoq.

Taassuma nuannaarutigaa, aasaq manna misissuinerup inerneri suliffeqarfiup soqutigilluagaanik saviminernik akoqarluarsimanerat.

Ujarassiornermik ingerlatsiviup misissuinera marloqiusaavoq. Siusinnerusukkut piaaffiusimasoq periarfissaqarluarsinnaasoralugu misissorneqarpoq – aningaasanillu iluanaarutigilertorfiusinnaanersoq misissorneqarluni.

Taassuma avataatigut sermip eqqaani misissuisoqarportaaq. Taakani peqarnissaa ilimanaatilerujussuusoq Angus and Ross-imit oqaatigineqarpoq. Sermilli eqqaani misissuinerit itinerujussuummata misissuineq sivisunerullunilu aningaasartornarnerussasoq erseqqissaatigineqarpoq.