Nunanut allanut unammisartut: Tullissaani finalimut anngukkusuppugut

Naak VM-imut anngunniunermi kalaallit 3-nnguinnaraluarlutik, Den Dominikanske Republikinut unamminermi angusatik nuannaarutigeqaat.

Kalaallit uanamminermi 22-20-mik ajugaapput

Bronzinnappusi, tamanna qanoq misigisimanarpa?
- Nuan! Sungiusarnerpassuit atornikuullugit, angusaq tulluusimaarnaqaaq, Anja Heilmann oqarpoq. Uanili unamminermi 1-nngorsimagaluarunik nunarsuarmi nunat tamakkerlugit pissartanngorniutilerpata unammeqataasinnaassagaluarput, tassungalu angunngitsoornertik uggoreqaat.

Tamannali anguniakkamik nutaamik pilersitsivoq

Tullissaani qanoq angusaqarnissassinnik neriuuteqarpisi?

- Tullissaani angorusupparput finali, unammisaqattaarnitsinni naligiiffiusorujussuugami, holdit allat naligisorujussuugatsigit, Lykke Frank Hansen oqarpoq. 

Tamannali anguniarunikkut sungiusartarnertik annertusissavaat, Danmarkimilu arsaqatit naapikulaneruneratigut finalimut anngussinnaanertik naatsorsuutigaat.

Taamatullu Kalaallit Nunaanni assammik arsartartut kattuffianni siulittaasup naatsorsuutigaa. Ullumikkullu angusaat tulluusimaarutigalugu taanna oqarpoq.

- Nuannaarpunga tulluusimaarlungalu angusaq annertuvoq, aamma suliniutitsinnut ilaagami taanna arnat nunami allanut unammisartoqarneq annertusaavigineqarnissaat oqareernertullu nammineq akilersugarivarput, taamaattumik nuannaaqaanga takutitsisinnaagatta aamma piumassuseq tassuunatigut kinguneqartitsisinnaasoq, Kalaallit Nunaanni assammik arsartartut kattuffianni siulittaasoq, Jørgen Olsen KNR-imut oqarpoq.

Cuba nunarsuami assammik arsarnermi pissartanngorniunnissamut ingerlaqqippoq, taakkulu ukiup naajartulernerani novembarimi Japanimi unammissapput.