Tullersortissanngorniuttut TV-kkut unnugu naapissapput
44-nik ukiullip, politikkikkut misilittagaqarpallaanngitsup, Sarah Palinip, naapissavaa misilittagaqarnerusoq, 65-inik ukiulik, senatori, Joe Biden.
Sarah Palinip præsidentip tullersortissaatut qinigassanngortinnera politikip tungaatigut ilisimasaqarpallaannginnera pissutigalugu Konservativinit nuimasunit allaat isornartorsiorneqarpoq.
Aviisip Washington Postip isumasiuisitsinerani nutaami tamanna uppernarsineqarpoq. Aperineqartut 60 procentii isumaqarput, John McCain qineqqusaarnermi iluatsitsissanngikkaluarpat Sarah Palin præsidentip tullersortissaatut piukkunnanngitsoq. Isumasiuinermut kingullermut assingusumik qaammatip ataatsip matuma siorna isumasiuisoqarmat 45 procentiinnaat qularaluarput.
TV-kkut unnugu oqallinnissami malinnaasussat ilimagisamit amerlanerussangatinneqarput, præsidentinngorniuttummi, Barack Obama aamma John McCain, TV-kkut siullerpaamik sapaatip akunnerani kingullermi oqallimmata isiginnaartut 52 millioniusimapput.
