Canada: Tuktoyaktuup Inuuvillu akornanni aqqusineq iluaqutaalluartoq
Tuktoyaktuumit Inuuvimmut aqqusernup 140 kilometeritut isorartutigisup sananeqarnera ukiunik pingasunik sivisussuseqarpoq.
Aqqusineq ukiut 50-it sinnerlugit oqaluuserineqarpoq, aqqusinniortoqarnissaalu Canadami naalakkersuisunit, Inuvialunnilu naalakkersuisunit 2013-imi aatsaat aalajangerneqarpoq, naak aqqusinniortoqarnissaa 1,3 milliardit koruunit missaannik akeqartussaasoq.
Canadap Issittortaata sineriaanit nunaqarfimmit nunap sinneranut aatsaat aqqusinniortoqarpoq. Canadap imartaanut pingasunut tamanut taamaasilluni aqqutissaqalerpoq.
Aqqusinniortoqarneratalu immut akilersinnaanera paasinarsereerpoq, Tuktoyaktuumimi innuttaasunut 900-t missaanniittunut iluaqutaasimaqaaq.
AAMMA ATUARUK Inuviup Tuktoyaktuullu akornanni aqqusinissaq piareertoq
Nerisassanik allanillu Canadap kujasissortaanit pilersuineq ajornaannerulerpoq, nioqqutissallu ataatsimut isigalugit akikinnerulersimallutik. Nioqqutissat maannamut timmisartuunneqanngikkunik, umiarsuakkoorlugit sikukkoorlugilluunniit Tuktoyaktuukkimut apuunneqartarsimapput.
Inuit napparsimasut, ajoqusersimasulluunniit napparsimmaviliaanneqapallassinnaasimannginnerat inuit inuunerannik ilaatigut naleqartarsimasoq, Tuktoyaktuukkip borgmesteriata Merven Grubenip oqaatigaa.
Tuktoyaktuukkillu aningaasarsiornera pitsanngoriaateqarpoq, takornariammi 5000-it missaat aasaq manna tikissimapput.
Tuktoyaktuukip borgmesteriata ilanngullugu oqaluttuaraa neriniartarfik nutaaq, akunnittarfillu nutaaq aasaq manna sanaeqassamaartut.