Tuberkulose Nunatsinni suli ajornartorsiutaangaatsiarpoq
Nunatsinni atugaanera nunanut allanut naleqqiullugu ajoraluartumik annertuupilussuuvoq. Afrikami nunanut siuariartortinniakkanisulli atugaatigivoq, annikillisarniarneqassappallu TB pillugu periusissaq naalakkersuisut tunuartut akuerisimasaat pimoorullugu ingerlatiinnarneqartariaqarpoq. Tuberkulosep akiorniarneranut paasissutissiissutigineqarnissaanullu Nunatsinni ukiumut 6 - 7 mio. kr.-it atorneqartarput.
-Nunatsinni tuberkulosemut tunngatillugu annertuunik unammilligassaqarpugut. Ukiorpassuarni Kujataanerusoqw ajornartorsiutigineqarpoq, maannalu aamma tunumi Tasiilap eqqaani ajornartorsiutigineqarnerpaalluni. TB-p bakteriai assigiinngitsut arlaqarput, resistentit, multiresistentillu kiisalu pissuserisai nutaat katsorsarneqarsinnaanngitsut. Qujanartumilli maannamut Nunatsinni multiresistentimik tuberkulosertoq ataasiinnaq naammattoorneqarsimavoq.
Tuberkulosemik napparsimasoqalersillugu peqqinnissaqarfik annertuumik suliniuteqalersarpoq, ilaqutaasut, ikinngutaasut qanigisallu tunillatsissimanersut napparsimalersimanersullu misissuiffigineqartarlutik, Nunatta nakorsaaneqarfiani peqqissaanermi siunnersorti Thomas Rendal oqarpoq.
Tuberkulose akiorniarlugu ukiut tamaasa nunarsuaq tamakkerlugu milliarderpassuit atorneqartarput, ilungersorlunilu akiorniarneqaraluartoq tunillatsissimasut kissaatigineqartutut sukkatigisumik ikiliartunngillat. bakterissap Mycobacterium Tuberculosisip najuussorneratigut puannullu nippussinnarluni nappaat siaruaatilersarpoq.
-Nappaat 80-ikkunni annikillingaatsiarparput, tamatumalu kingunerisaanik aamma ajoraluartumik suliniarfigiunnaarlutigu. Tamatuma malitsigisaa sivittunngisoq takusinnaalerparput, tassalu nappaatip inuiaqatigiinni kalaallini atugaaqqilernera. Taamaammat tuberkulose akiorniarlugu sulinitta ingerlateqqinnissaa pisariaqarluinnarpoq, nappaammi inuiaqatigiinnut akisuupilussuvoq aammalu toqqutigineqarsinnaalluni.
Ukiut tamaasa marsip 24-iani ”World TB Day” ingerlanneqartarput, ullormilu tassani tuberkulose inuiaqatigiinnit immikkut sammineqartarluni. Peqqinnissaqarfiup kisimiilluni suliassaq naammassisinnaanngilaa, Thomas Rendal naggasiilluni knr.gl-imut oqarpoq.
