Tuaviorpallaarput

Alumiiniuliorfissamik sananiarnersi tuaviuuteqinasiuk – inuiaqatigiilerinermik ilisimatooq, taama oqarpoq.

Taassumap annilaangatigaa, alumiiniuliorfimmik sanasoqassappat Naalakkersuisut Inatsisartullu sanaartugassap suut kinguneriumaarnerai nalummatigik, aningaasatigut isertinneqarumaartussat kisiisa pimmatigit.

-”Aarlerinartoqartitara tassaavoq, itinerusumik misissuilluartoqarusunnginnera”

Inuiaqatigiilerinermut ilisimatooq Ilisimatusarfimmilu lektor-iusoq, Birger Poppel-ip, annilaanganartoqartippaa politikerit atorfilittallu alumiiniuliorfissamik sanaartortitsinissaminnik nukinnguteqarnerujussuat. Misissuisimanerilluunniimmi inerneri qanoq ittuunersut iluamik nalummatigit.

-” Politikerinut apeqquteqartoqassappat – massakkuusariaqarpoq, sanaartornermi aallartippat qanoq iliuuseqarnissamut inortueriissagatta. Kukkussuteqarsimanerimmi kingusinaartumik paasineqalissagaluarpata taava qanoq iliorsinnaajunnareerluta aatsaat paasinnilersussaangata.

Mingutitsisoqannginnissaanummi upalungaarsimanissaq eqqarsaatigalugu avatangiisit kingunerisinnaasaat iluamik misissorneqartariaqarput, Birger Poppel oqarpoq.

Sapaatip akunnerata tulliani Naalakkersuisut Danmark-imi Avatangiisit pillugit Misissueqqissaartarfimmiit nassuiaat suliarisussaavaat.

Radioaviisillu paasisai malillugit Danmark-imi Avatangiisit pillugit Misissueqqissaartarfiup nassuiaammini inassutigisimavaa, alumiiniliorfissap sananeqarnissaanut nivaatsersortoqalinnginnerani misissueqqissaarnissamut ukiut pingasut atorneqartariaqartut.

-”Ukiut arlallit atorneqartariaqarput naammattumik suliamut tunngatillugu ilisimasaqalernissamut”. Taama oqarpoq; Danmarkimi Avatangiisit pillugit Misissueqqissaartarfimmeersoq, Poul Johansen, Nunat isittut Avatangiisaannut tunngasunik sulialik.

Ukiuni pingasuni misissueqqissaartoqarnissaanik piumasaqaatit malinneqanngippata qanorpiaq pisoqassanersoqm, Biger Poppel-ip ima nassuarpaa:

-”Taava aalajangiinissamut annikinneralaarsuarmik toqqammaveqarluni sanaartornerit aallartinneqassapput” !.

Apeqqutaaginnalerporlu politikerit Danmarkimi Avatangiisit pillugit Misissueqqissaartarfiup ukiuni pingasuni misissueqqissaartoqarnissaanik innersuussutaa malikkumassaneraat.! Birger Poppel naggasiilluni taama oqarpoq.

Sapaatip akunnerani uani Pinngortitamut Avatangiisinullu Pisortaqarfiup kiisalu Norge-miit suliffeqarnermut pisortaqarfiup sinniisuutitaasa suliffeqarfissuup Hydro-p ilisimasai saqqummiutissavaat.