Truss tunuaqquneqartoq: Tunniutiinnarnavianngilanga
![](/sites/default/files/styles/image_934x467/public/article_images/20221019-214626-l-4242x2828ma.jpg?itok=0fib907Q)
Tuluit Nunaanni ministeriuninngorlaap, Liz Trussip, inissisimanera ilungersunarsigaluttuinnnarpoq.
Tuluimmi inatsisartuisa aappaanni ippassaq pingasunngornermi apeqqarissaartoqarnerani sakkortoorujussuarmik isornartorsiorneqarpoq.
Truss inatsisartut appaata ataatsimiittarfianni ilaatigut tunuaqquneqarluni nilliaffigineqarpoq.
Tunuaqquneqarnerminik kaammattuuteqarneq itigartippaa.
Taamaattorli ungasinngitsukkut ministeriuninngoreernermini kukkussutigisimasani pillugit utoqqatserpoq.
- Kukkussuteqarnikuuvunga, tamannalu erseqqissumik ajuusaarutiginerareerpara. Tunniutiinnartartuunngilangali. Ilungersuuteqartartuuvunga, Truss oqarpoq.
AAMMA ATUARUK Tusagassiuut: Truss konservatiivinit uppisinniarneqartoq
Akileraartarnermut pilersaarut qaammammi kingullermi saqqummiunneqartoq Trussimut eqqissiviilliuutaalerpoq.
Akileraartarnermut pilersaarut annertuumik ikiunissamik imaqarpoq, tassalu nukissiuutinut akit ukiornissaanut annertuumik qaffannissaannut tapiinissamut tunngassuteqarluni.
Tuluit Nunaanni ingammik atugarissaanerusut akileraarutitigut oqilisaaffigineqarnissaanut tunngasoq akerleriiffiunerpaavoq. Pilersaarut taanna Tuluit Nunaanni aningaasaqarnikkut niuffannermi aalassatitsillunilu tuluit aningaasaata pundip nalinga apparujussuarneranik kinguneqarpoq.
Liz Trussip ukiup naannissaanut ministeriuneruinnarnissaa amerlasuunit qularutigineqarpoq.