Tusagassiuut: Truss konservatiivinit uppisinniarneqartoq
Naak uppisitseriartoqassappat tamanna qinersinermik kinguneqarsinnaasoq, Tuluit Nunaanni konservatiivit sinnerlugit inatsisartunut ilaasortat siulittaasortik, ministeriuneq Liz Truss, sapaatit-akunnerata massuma ingerlanerani uppiseriarniarpaat.
Aviisip Daily Mailip, tusarfiit atersineqanngitsut issuarlugit tamanna allaaseraa.
Akileraartarneq pillugu nutaatut aaqqissuusseqqittoqarnissaa pillugu Trussip siunnersuutini septembarimi saqqummiuppaa, konservatiivinilu kingorna aaqqiagiinngissuteqartoqalerluni.
Nukissiuutit akitsoriartuinnarnerat eqqarsaatigalugit Tuluit Nunaanni innuttaasut aningaasanik ukiuunerani ikiorserneqarnissaat Liz Trussip siunnersuutigaa. Akileraarnikinnerusoqarnissaali Trussip aamma siunnersuutigaa, siunnersuutilli aningaasalersorneqarsimanngitsut oqaatigineqarpoq, akissaateqarnerusullu aamma akileraarnikinnerusalernissaat siunnersuutigineqarmat Truss apeqquserneqarpoq.
AAMMA ATUARUK Lizz Truss Tuluit Nunaanni ministeriuninngortoq
Akileraartarnermi aaqqissuusseqqittoqarnissaa Tuluit aningaasarsiornerannik aalassatsitsilerpoq, tuluillu aningaasaat pundi aamma nalikinnerulerluni.
Akileraartarnerulli aaqqissuuteqqinneqarnissaanut siunnersuutini Trussip tallimanngormat allannguiffigilaarpaa, aaqqissuusseqqittoqarnissaalu peqqissaartumik suliarineqarnissaa neriorsuutigaa, pilersaarutilli pingaarnerit attanneqarlutik.
Konservatiivit akornanni taasisoqareersorlu Liz Truss Tuluit Nunaanni septembarip ulluisa arfernanni ministeriuninngorpoq.