Trumpip USA-p Afghanistanimi sakkutuui juullinnginnerani angerlartinniarai
USA-p Afghanistanimi sakkutuui juullinnginnerani angerlartinneqarumaartut, USA-p præsidentiat Donald Trump Twitterikkut allappoq.
USA-p oqaluttuarisaanerani sorsunnermut aatsaat taama sivisutigisumut peqataanerup unitsinneqarnissaa maanna siuartinnialerpaa. USA Afghanistanimi 2001-imili sakkutuuliivoq.
USA-p islamisiortullu Talibanimeersut Qatarimi Dohami ukioq manna februaarip ulluisa 29-anni isumaqatigiissusiorfigai, USA-p sakkutuui aappaagu 2021-p qiteqqunnerani angerlartinneqassasut.
AAMMA ATUARUK Talibanikkut USA-mik eqqisseqatigiinnissamut isumaqatigiissut nalorninartoqalersikkaat
USA-p sakkutuuisa angerlartinneqarnissaannut Trumpip nalunaarutaa Talibanit nuannaarutigaat. Dohami isumaqatigiissutip atuutilersinneqarnissaanut alloriarnerusoq, islamisiortut oqaaseqartitaat oqarpoq.
USA-p sakkutuuisa Afghanistanimit juullinnginnerani angerlartinneqarnissaannut Trumpip nalunaarutaa, USA-mi præsidentimut qinersisoqarnissaanut qaammataannanngortoq saqqummiunneqarpoq. Trump inunnik isumasiuinerit naapertorlugit kinguarsimavoq.