Trumpip nunatsinnut pisinissamik isummersornera Nuummiunit quianaagineqarpoq
USA-p præsidentiata Kalaallit Nunaat pisiariniarlugu arlaleriarluni eqqarsaatigisarsimavaa.
Amerikami aviisimi pissaaneqarluartumi Wall Street Journalimi oqaloqatigineqartut kikkuunerminnik isertuussisut taama oqarput.
KNR-ip tallimanngornermi ullaap tungaani Nuuk Centermi naapitaasa ilaasa tamanna isumassarsiatsialaannginnerarpaa.
Josef Joelsen:
Nunatsinniillutit amerikami innutaassuseqarlutit takorloorsinnaaviuk?
- Naamerluinnaqqissaaq, naamik saperpara.
Donald Trumpip nunatsinnut pisiumasimanera qanoq isumaqarfigaajuk?
- Illarnaannarpoq aappaatigut, paasiuminaallunilu nunarput qanoq akilerlugu pisiarerusussinnaaneraa, naliitsuugami. Immaqa USA vakassagaluarparput.
Mikael Ludvigsen:
Nunatsinniillutit amerikami innutaassuseqarlutit takorloorsinnaaviuk?
- Naamerluinnaq, naamerluinnaq!
Donald Trumpip nunatsinnut pisiumasimanera qanoq isumaqarfigaajuk?
- Isumaqarpunga ilumoorutinngikkaa aamma tatiginanngitsuugami inuk taanna. Upperinngilara taanna, piviusuunngitsinik oqariataartartortoqaagami taanna præsidenti. Uppernassuseqanngitsumik præsidentimik aatsaat takuvunga.
Mike Thomsen:
Nunatsinniillutit amerikami innutaassuseqarlutit takorloorsinnaaviuk?
- Naamik!
Donald Trumpip nunatsinnut pisiumasimanera qanoq isumaqarfigaajuk?
- Soorunalimi isumaqarpunga sunaluunniit sunaluunniit nunarsuarmiittoq nuna sunaluunniit pisiarineqarsinnaanngitsoq. Qanorluunniit aningaasanik akilerlugu isaasalerlugu pisiaritigigaluaraanni nuna pigilerneqarsinnaanngilaq. Aamma asuli inuup taamaattup oqaasii qanoq uppernartigippat? Sulisuunniit qammarsualiortoqarnikuunngilaq, uffa taanna qineqqusaarutiginikuugaa. Soqutigivallaanngilara, asuleernertut isigivara taamaaliortoqarsinnaanngilaq 2019-imiippugut.
Jensine Lerch:
Nunatsinniillutit amerikami innutaassuseqarlutit takorloorsinnaaviuk?
- Ilaana takorloorsinnaavara.
Donald Trumpip nunatsinnut pisiumasimanera qanoq isumaqarfigaajuk?
- Immaqami pitsaanerussaaq qallunaaniit aqunneqarunnaarutta, taanna aamma ajunngitsutut isumaqarfigisinnaavara.
