Trumpip nunarput pisiariumareeralu danskit politikeriisa nunarput pillugu oqalliseriaasiat allanngupiloortoq
Danskit politikeriisa nunarput pillugu maanna oqalliseriaasiat, USA-p præsidentiata, Donald Trumpip, nunatsinnik pisiariumanninnginnerani oqalliseriaasiannit allanngupiloorpoq.
Nunani tamalaani pissutsinut tunngasulerinermi ilinniagartuup, Signe Lyngholm Lindbjergip, immikkut sammisaqarluni allaatigeqqammisaani tamanna erserpoq.
- Allanngupiloorpoq, folketingimimi politikerit Naalagaaffeqatigiit ataasiussuteqarnerakkajulerpaat. Taakkua ataqatigiilluartorujussuusalernerarpaat, taanna oqarpoq.
USA-p nunatsinnik pisiariumanninnginnerani, danskit politikeriisa nunarput Danmarkip Issittumut ataneranut uiggiutaanerartarpaat.
- Tamanna Issittup Folketingimi 2019-imi oqallisigineqarnerani allanngorpoq. Naalagaaffeqatigiit akornanni assigiinngisitsisoqarneraasalerlutillu naligiinnerusumik atassuteqatigiinnissaat kissaataanerartalerpaat, Signe Lyngholm Lindbjerg oqarpoq.
Danskit politikerii tukummattut
Trumpip nunatsinnik pisiariumanninnginnerani pisiariumanninnereerneranilu Issittoq pillugu Folketingimi oqalliseriaatsit Signe Lyngholm Lindbjergip qulaajaqqammerpai.
Donald Trumpip nunatsinnik USA-mut ilanngutiteriaraluaanera danskit politikeriisa annilaarutigisimagunaraat, taanna oqarpoq.
- Kalaallit Nunaat naatsorsuutigiinnarneqarsinnaanngitsoq paasilerpaat. Danskit politikeriisa atassuteqaqatigiinnermi assigiinngisitsisoqartarsimanera tukummatigilerlugulu miserratigiunnaarunarpaat, taanna oqarpoq.
Allanngortitsinerammi danskit nunanut allanut ministeriata Jeppe Kofoedip (S) nunatsinnik Issittoq pillugu nutaamik periusissiornermi peqataatitsinerunerani erserpoq. Periusissiaq taanna Naalagaaffeqatigiinnut tamanut atuutissaaq.
- Ataatsimut periusissiatut taavaa. Naalagaaffeqatigiinni innuttaasut periusissiornermi peqataatinnissaat qanoq pingaaruteqartigisoq erseqqissarpaa, Signe Lyngholm Lindbjerg oqarpoq.
USA pillugu oqalliseriaasiat aamma allanngortoq
Donald Trumpip nunarput siorna pisiariumammagu, tamanna illunik tuniniaanermut assersuuppaa. Tamannalu nunatsinnit Danmarkimillu isornartorsiorneqarpoq.
Nunatsinnik pisiariumanninnera USA pillugu Folketingimi oqalliseriiaatsip aamma allanngungaatsiarneranik kinguneqartoq, Signe Lyngholm Lindbjerg naliliivoq.
- USA pillugu 2018-imi oqalliseriaasiat 2019-imi oqalliseriaasiannit allaanerulerpoq, USA-mi ikinngutaajunnaarnerariarlugu akeqqersimaarfigilermassuk, taanna oqarpoq.
Signe Lyngholm Lindbjergilli Naalagaaffeqatigiit USA-mik isiginneriaatsiminnik allannguingaarnavianngissorai. Pingaartumik demokratip Joe Bidenip præsidentitut qinigaaqqammernera nunanillu allanik Donald Trumpimit attaveqateqallaqqinnerunera pissutigalugit.
