USA-p nunatut isumannaatsuunissaq pillugu Kalaallit Nunaat pisariaqartippaa. 

 USA-mi præsidenti, Donald Trump, najukkamini Mar-a-Lagomi Floridamiittumi tusagassiortunik ataasinngornermi katersortitsinermini taama oqarpoq.

USA-p præsidentiata Jeff Landry, Louisianami guvernøriusoq, USA-p Kalaallit Nunaannut immikkut aallartitaatut ataasinngornerup unnuaani toqqareerlugu taamatut nalunaaruteqarpoq.

 Landry Kalaallit Nunaannut immikkut aallartitatut qanoq inissisimassanersoq, aamma Trumpip Kalaallit Nunaata Amerikamiunit tigummilerneqarnissaa suli kissaatigineraa, tusagassiortup ataasinngornermi tusagassiortunik katersortitsinermi apeqqutigaa.

- Angutaavoq tupinnartoq, isumaqatiginninniartartuuvoq. Isumaqatiginninniartartorpalaarpoq. Nunattalu isumannaatsuunissaanut atatillugu Kalaallit Nunaat pisariaqartipparput, Trump oqarpoq nangillunilu:

- Innuttaasukitsuaraavoq. Taavalu naluara, Danmarki eqqaavaat, kisianni Danmarki aningaasanik atuinikuunngilaq nunalu sakkutooqarnikkut illersorneqarnani.

- Danmarki ukiut 300-t matuma siorna tamatumaluunniit missaata matuma siorna umiatsiarlutik tikissimasut oqarput. Uagut aamma umiatsiarluta tikinnikuuvugut, tamanna qularinngilara. Taamaattumik tamakkua tamarmik aaqqiissutissarsiortariaqarpagut, taanna oqarpoq.

'Aalassaqqarujussuarneq'

USA-p isumannaatsuunissaa pillugu Kalaallit Nunaat tiguartariaqaraa, Donald Trumpip arlaleriarluni oqaatigereernikuuaa.

Aamma nunap immikkoortuanik aqutsilernissamut sakkutuunik atuinissaq siornatigut tunuarsimaarfiginnginnerareerpaa.

Danmarkip naalakkersuisuisa USA-p præsidentiata Kalaallit Nunaannut immikkut aallartitamik toqqaaniarluni aalajangernera  ataasinngornermi sakkortuumik isornartorsiorpaat.

- Toqqaasoqarnera oqaaseqaataalu aalassassutigeqaakka, akuerineqarsinnaanngilluinnarpormi.

- Kunngeqarfiup oqartussaassusia kunngeqarfimmut atavoq, nunanut allanut ministeri Lars Løkke Rasmussen (M) TV 2 Newsimut oqarpoq.

USA-p aallartitaa Ken Howery  „erseqqissumik killiliiffiginiarlugu nassuiaateqaqquniarlugulu“, nunanut allanut ministereqarfimmut qaaqquniarpaa.

Statsminister Mette Frederiksen (S) aamma Naalakkersuisut siulittaasuat Jens-Frederik Nielsen ataasinngornermi aamma sakkortuumik oqaaseqarput.

- Siornatigut erseqqissumik oqaatiginikuuarput. Maannalu aamma oqaatigeqqipparput. Nunat killeqarfii naalagaaffiillu oqartussaanerat nunat tamalaat inatsisaanni aalajangersarneqarpoq.

- Kalaallit Nunaat kalaallit pigivaat, USA-llu Kalaallit Nunaat tiguassanngilaat. Naalagaaffittut ataatsimoorfitta ataqqineqarnissaa naatsorsuutigaarput. 

Landry Kalaallit Nunaannut immikkut aallartitatut sooq toqqarneqarnersoq, Trumpip White House-llu sukumiinerusumik oqaatiginngilaat. Aamma Landryp immikkut aallartitatut suliassai erseqqissumik oqaatigineqanngillat.

Trumpip kingoraagai isumaqatiginninniarnernik ajornakusoortunik ajornartoornermillu nalaanneqarnerni isumaginnittussanik immikkut aallartitanik toqqaasarnikuupput. 

/ritzau/