Mexicomiut Canadaliartut amerliartuinnartut
Mexicomiutut innuttaassusillit USA-mit Canadamut ukioq manna ulluni siullerni 67-ini iserniartut ima amerlatigaat allaat ukiut kingulliit pingasut katillugit amerlassusaannit amerlanerullutik.
Pappilissat, tuluit nutaarsiassaqartitsiviata Reutersip pissarsiarisimasaasa tamanna takutippaa.
Mexicomiut Canadamut isersinnaanissaannut visumeqartarnissaannut piumasaqaatit Canadamit sukannerpallaarunnaarsinneqareersullu taama pisoqarpoq.
Angalanissamut nalunaarummik immersuisoqarnissaa maanna piumasaqaatituaalerpoq, immersugassarlu taanna internetikkut aaneqarsinnaalluni.
Angalanissamut nalunaarutit Mexicomiunit immersorneqarsimasut siorna decembarip aallaqqaataanit ukioq manna marsip ulluisa qulingata tungaanut 72.450-it Canadami oqartussanit akuerineqarsimapput. Siusinnerusumut naleqqiukkaanni amerlanerujussuupput, visumeqaqqaarnissaq siornatigut piumasaqaataammat.
/ritzau/