Trumpip pisortanngortitani ullut aqqanillit qaangiutiinnartut soraarsikkaa

Trumpip tusagassiortunut oqaaseqartartuata, Sarah Huckabee Sandersip, erseqqissaatigaa Scaramuccip kingullertigut oqaatigisarsimasai USA-p præsidentiata iluarinngikkai.

- Præsidenti isumaqarpoq Anthonyp taamatut inissisimaffeqarluni oqaatigisai naleqqutinngitsuusut, tusagassiortunut oqaaseqartartoq oqarpoq.

Anthony Scaramuccip aviisimi sapaatit-akunneranut saqqummersartumit The New Yorkerimit oqaloqatigineqarnermi atorfilittat pisortaat Reince Priebus soraarsinniarlugu tarnikkullu nappaateqarnerarlugu oqaaseqarsimanera tamatumani innersuussutigaa.

Priebus tamatuma kingunitsianngua Præsidentip Illorsuani atorfeqarunnaarpoq sillimaniarnermullu ministeriusimasumit John F. Kellymit ippassaq ataasinngornermi taarserneqarluni.

Attaveqaqatigiinnermut pisortatut tunuartoq Trump allaffeqarfiani sapaatit- akunnerini kingullerni suliunnaartut kisiartarinngilaat.

Sean Spicer Præsidentip Illorsuani tusagassiortunut oqaaseqartartutut aamma tunuaqqammerpoq, The New York Timesilu naapertorlugu, Anthony Scaramuccip atornitsinneqarnera isumaqataaffiginagu tunuarpoq.