Trumpip assi Kalaallit Nunaannut inuulluaqqussut nittaqqikkaa
USA-p præsidentiata Donald Trumpip Kalaallit Nunaat suli sammiuarpasippaa.
USA-p præsidentiata Kalaallit Nunaanni illoqarfiit ilaasa assinga namminerlu assi qulangerlugu isiginninneranit assilialiaq, præsidentip inoqatinut attaveqaataani, Truth Socialimi, arfininngormat saqqummiuppaa. Qaqqaq assimi tunorlermiittoq aalajangersimasumik tigummivaa.
Assi “Hello, Greenland"-imik allannertaqarpoq - "Haluu Kalaallit Nunaat" kalaallisut.
TV 2-p nutaarsiassiinera naapertorlugu Tunumi illoqarfik Tasiilaq pineqarpoq.
Trumpip assi taannarpiaq maajip 23-anni saqqummiuppaa.
Donald Trumpip assi taanna, Kalaallit Nunaannut immikkut aallartitaa Jeff Landry Issittumut tikeraareersorlu, siullerpaamik saqqummiuppaa.
Taanna Nuummut sapaammi maajip 17-ianni tikippoq Kalaallit Nunaannilu naalakkersuisut kingusinnerusukkut ataatsimeeqatigalugit.
Naalakkersuisut ataatsimiinnerat
Naalakkersuisut siulittaasuat Jens-Frederik Nielsen (D) nunanullu allanut naalakkersuisoq Múte B. Egede (IA) USA-mit aallartitallu pitsaasumik ataatsimeeqateqarsimanerarlutik tamatuma kingorna nalunaarput.
Jens-Frederik Nielsen tusagassiortunik katersortitsinermi oqarpoq, naalakkersuisut aallaqqaammulli erseqqissaassutigisartagaat taakkua marluk erseqqissarsimagaat.
- Oqarpugut Kalaallit Nunaat kalaallillu inuiaqatigiit ataqqineqassasut, naalakkersuisut siulittaasuat tusagassiortunik Nuummi katersortitsinermi oqarpoq.
Landryp USA-p Kalaallit Nunaanniinnini piorsaqqittariaqaraa aallannginnermini uteqqiilluni oqaatigaa.
- Killiliussaq uagutsinnut ataasiinnaavoq. Taannalu aappaluttuuvoq, qaqortoq tungujortorlu.Præsidentip Kalaallit Nunaata nunarsuup kitaata tungaaniinnera pissutigalugu Kalaallit Nunaat pingaartikkaa eqqaamasariaqarparsi, Jeff Landry kalaallit aviisiannut Sermitsiamut oqarpoq.
USA-p Danmarkimi aallartitaata Ken Howeryp oqarnera naapertorlugu, Trumpip "pissaaneq atorlugu tiguaaniarunnaarpoq“.
- Kalaallit Nunaata siunissaa kalaallit namminneq aalajangertussaavaat, taanna KNR-ip nutaarsiassiinera naapertorlugu, Amerikamiut Nuummi konsuleqarfiata nutaap maajip 21-anni ammarneqarnerani taama oqarpoq.
