Ritzau Nunanit allanit

Trumpip Amerikami qiterlermi nunanut tapiissutit ilanngarai

Nunanut Amerika qiterlermiittunut pingasunut USA-p aningaasatigut tapiissutigisartagaata ikiliserujussuarneqarissaat USA-p præsidentiata Donald Trumpip peqqussutigaa.

Allattoq Ritzau

oktobarip 23-at 2018 08:41

Nutserisoq Jaaku Lyberth

Taama peqqussuteqarnera pissuteqarpoq, nunasiniat tuusintillit Guatemalap killeqarfia qaangerlugu Mexicomut maanna ingerlaarmata, tassanngaaniillu USA-p killieqarfianut ingerlaqqissallutik.

- Amerika qiterlermiittut nunat Guatemalap, Hondurasip aamma El Salvadorip innutatik nunaminnit qimagutinnginnissaat pinngitsoortissinnaasimanngilat, taakkua unioqqutitsillutik USA-mut ingerlaarput, USA-p præsidentia attaveqaqatigiittarfimmi Twitterimi allappoq.

Nunat pingasut taakkua Amerika qiterlermiittut USA-mit siorna 2017-imi katillugit 3,3 milliardit koruuninik tapiiffigineqarput.

Qimaasorpassuit ingerlaaqatigiittut Mexicop killeqarfiata eqqaanut illoqarfimmut Tapachulamut sapaatip akunnerata naanerani apuupput. Taakkua Mexicomi politiinit unitsinneqarsinnaasimanngillat.

Qimaasut Hondurasiminngaanersut nunaminni annertuumik peqquserluttuliortoqartarnera, piitsuuneq persuttaasarnerillu pillugit qimaapput.

Qimaasorpassuit ingerlaaqatigiittut Amerikap killeqarfiata tungaanut 1800 kilometerisut isorartutigisumik ingerlaarniarlutik siunertaraat.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.