Trump: Yemenimi al-Qaedap siuttua amerikamiunit toqutaavoq
Arabiap qeqertaasaani (Aqap), Qasim-al-Rimimi, al-Qaedap siuttua amerikamiunit Yemenimi peqqarniisaarnianik akiuiniarnermi toqutaavoq.
USA-p præsidentia, Donald Trump, Det Hvide Husip tusagassiutinut tallimanngornermi nalunaarutaani taama allappoq.
- Aqap al-Rimi sinnerlugu Yeminimi innuttaasunut soqqusaatsumik nakuusernikuusoq, USA-mullu sakkutuuinullu saassuseriaqattaarnikuullunilu inuppassuit USA-mut sakkutuuinullu saassussinissaannut kaammattuinikuusoq, Trumpip tusagassiutinut nalunaarummi ilisimatitsissutigaa.
- Al-Qaedap siuttuata toqutaanera Aqapip nunanilu tamalaani al-Qaedat
sanngiilliallaatigissavaat, nunattalu isumannaatsuuneranik innarliiniarlutik saassussinissaminnut sioorasaarisarnerannut akiuiniaqatigiinnerunissatsinnut iluaqutigissavarput.
Qasim al-Rimi qangarpiaq toqutaanersoq, Trumpip tusagassiutinut nalunaarummi ilisimatitsissutiginngilaa.
Sakkutooqarfimmut saassussisuunerartoq
Amerikap ilaani Floridami inuit pingasut toqutaanerannik inuillu allat arfineq-pingasut ikiligaanerannik kinguneqartumik sakkutuup Saudiarabiamiup amerikamiut sakkutooqarfianni saassussineranik Aqap sapaatiummat piliarinnittuunerarpoq.
- Musliimeqativut pilluaqquagut upperisarpullu pillugu imminut pilliutigisup, Muhammad bin Saeed al-Shamranip, saassussinera qujarullutigu, al-Qaedap Yeminimi immikkoortortaa raatiukkut taama nalunaaruteqarpoq.
Aqapilli amerikamiut sakkutooqarfiannut decembarimi saassusseqataasimaneranut uppernarsaateqanngilaq.
Qasim al-Rimi musliimit sakkutuuisa naalagaannit Aqapimi 2015-imi juunip qaammataani siuttunngortitaavoq.
Sapaatip akunnerata siuliani oqallisaasoq
Aqapip siuttua dronemik Yemenimi illoqarfiit ilaanni Maribimi saassussinermi toqutaasimasoq, sapaatip akunnerata siulianili uppernarsineqanngitsumik nalunaarutigineqarpoq.
