Trumpip tullersortiminut qanillattornaveersaalernissani isumaliutigigaa
USA-p præsidentiata Donald Trumpip tullersortiminut Mike Pencemut attaveqartarnini killilersimaarnialerunarpaa.
Donald Trump præsidentip illorsuani Det Hvide Husimi tusagassiortunik ataasinngornermi katersortitsigami taama oqarpoq.
Mike Pencep tusagassiinermik sulisua Trumpillu saqisuisa ilaat nerisassanik præsidentimut sassaallersimasoq coronavirusimik tunillatsissimmata, taama nalunaaruteqartoqarpoq.
- Pencelu tamanna oqaluuserisaqariaqarparput, Trump Pencemut attaveqartarnini killilersimaarniarneraa aperineqarami akivoq.
Pencelu toqqaannartumik oqarani angerlarsimaannaqqusaagunarpoq. Trump taama aamma oqamisaarpoq.
- Misissortikkami tunillatsissimanngitsoq paasineqarpoq, inuppassuarnilli attaveqartarpoq, Trump oqarpoq.
Sulisut anersaartuutinut illersuuteqartarnissaminnut peqquneqarsimasut
Præsidentip illorsuani Det Hvide Husimi tunillatsittoqarsimasinnaanera Donald Trumpip tusagassiortunik katersortitsigami qassiiliutiginngilaa.
- Nunami ingerlatsiinnarnissarput kissaatigaarput, Det Hvide Husimullu inuppassuit isertarlutillu tassannga anisarput, taakkulu amerlanersaat tunillatsissimanersut misissorneqarput, Donald Trump oqarpoq.
Det Hvide Husimili sulisut Donald Trumpip suliffigissartagaaniittartut tamarmik anersaartuutinut illersuuteqartarnissaminnut peqquneqarsimasut, ataasinngornermi paasineqarpoq.