Trump: Innuttaasut millionit sinnerlugit coronaviruseqarnerannik misissortipput
Amerikamiut millionit sinneqartut coronavirusimut misissortereerput.
USA-p præsidentia, Donald Trump ataasinngornermi unnukkut taama nalunaaruteqarpoq.
Nualluut siaruatsaaliniarlugu innuttaasut apriilip naanissaata tungaanut katersuutissanngitsut aamma oqaatigaa.
- Kinaluunniit sorsuutigisatta ajugaaffiginissaanut pisussaaffeqarpoq. Innuttaasut tamarmik, ilaqutariit suliffeqarfiillu coronavirusip tunillaassuukkunnaarnissaanut allanngueqataasinnaapput.
- Ataatsimoorluta pisussaaffigaarput. Ulluni 30-ni tulliuttuni unammillernartoqassaaq, ullullu taakkua pingaaruteqarluinnassapput, Trump oqarpoq.
AAMMA ATUARUK Trump: Coronavirusimik toqquteqartut amerlanerpaaffimminniingajalersut
Amerikamilu amerlanerusunik anersaartuutiliortoqassasoq, tusagassiortunik katersortitsinermi ilanngullugu oqaatigaa.
Nunat allat, soorlu Spania Italialu coronavirusip nunarsuaq tamakkerlugu tunillaassuunneranik eqqugaqisut, anersaartuutinik pilersornissaannut naammattunik anersaartuutiliortoqassaaq.
Præsidentillu misissuinermut atortuliortoqarnissaa aamma sulissutigigitsik ilanngullugu oqaatigaa.
Trumpip misissuinermut atortut ilaata Abbottimik atillip misiligutaa tusagassiortunik katersortitsinermi puuiariarlugu aamma takutippaa. Inuttaata oqarnera naapertorlugu taanna misissukkanik minutsit tallimat ingerlaneranni inerniliisarpoq.
USA-mi nunap immikkoortuinut nassiussassanik misissuinermut atortuliugasuartoqarnissaa pilersaarutaasoq, Trump oqarpoq.