Trump ersernerluttuliortoq: 2024-mut qilanaartorujussuuvunga
USA-p præsidenterisimasaa Donald Trump præsidentimut sassaqqinniarunarpoq.
Donald Trump republikanerit North Carolinami immikkoortortaqarfiata ukiumoortumik ataatsimeersuarnerani oqalugiarami ukioq 2024-mut qilanaarnini oqaatigaa.
USA-mi præsidentimut ukioq taanna qinersisoqartussaavoq.
- Republikanerit North Carolinami ajugaaqqinnissaannut tunngaviliiumaarpugut, ukiumut 2024-mut qilanaarisannut, Donald Trump oqarpoq, parteeqataalu nuannaarlutik.
Trump præsidentimut 2016-imi qinersinermi ajugaavoq, siornalu novembarimi qinersinermi ajugaanini nammineq oqaatigaalugu.
USA-mili qinersinermut oqartussat tamanna ilumuunnginnerarpaat, Trumpilu præsidentiujunnaarluni Joe Biden præsidentinngorluni.
- North Carolinami innuttaasut Joe Biden demokratillu peersikkumaaraat qularutiginngilara, Donald Trump ataatsimeersuarnermi oqaatigaa.
AAMMA ATUARUK Trump: Ajugaaffigeqqeriaannaagunarpakka
Floridap avataani siullerpaamik oqalugiartoq
Præsidentiusimasoq North Carolinami oqalugiarpoq, USA-mi inatsisartut ataatsimiittarfiata ukioq manna januaarip ulluisa arfernanni saassunneqarnerata ulluani nammineq angerlarsimaffigisami Floridap avataani siullerpaamik oqalugiarluni.
Trump Floridami illoqarfimmi Orlandomi februaarip naalernerani oqalugiarpoq, talerperliuniat Conservative Political Action Conferencep, CPAC-ip, ataatsimeersuarnerani oqalugiarluni. Demokratit ajugaaffiginiarlugit uteqqikkumaarnini taamani oqaatigaa.