Trump El Pasomut tikeraalerpoq
El Pasomi borgmesteri republikaneriusoq Dean Margo taama oqaluttuarpoq.
- Præsident Trumpip ippassaq sianerfigaanga. Inussiarnisaartorujussuuvoq, sunullu tamanut ikiuunnissamut neqerooruteqarluni, borgmesteri oqarpoq.
Illoqarfimmi El Pasomi innutaasut amerlanerit latinamerikamiuupput taakkualu erseqqissumik oqaatigereerpaat, USA-p præsidentia El Pasomut tikilluaqquneqanngitsoq, ilaatigut Mexicomiunut latinamerikaminullu nikassaarpaluttumik oqaaseqartarnera pissutigalugu.
El Pasomi borgmesteri republikaneriusoq Trumpimullu tapersersuinerminik ersersitsereersoq oqarpoq, nammineq borgmesteritut pisussaafigigini præsidenti tikilluaqqussallugu.
El Pasomi aallaasersorsimasutut pasineqartoq Amerikamiuuvoq inuusuttoq qaamasumik amilik, aallaasersorneralu peqqarniisaarniarnertut latinamerikamiunullu saassussinertut pasineqarpoq.
Illoqarfik El Paso Mexicop USA-llu killeqarfianut qanittuuvoq, kuummik akunneqarluni.
Toqutaasunit 22-usunit arfineq pingasut Mexicomiuupput, pisiniarfissuarmiinnerminni aallaasersortoqarmat toqutaasut, borgmesteri oqaluttuarpoq.
- Killeqarfiit avissaarteqqagaluaraatigut, aliasunnitsinni ataatsimoorpugut. Toqutaasut innuttaaqatigisatsitut ataqqiniarpavut, El Pasomi borgmesteri taama oqarpoq.
