Tromsømi ajunngisaarumasoqaqaaq
Ullumi ulloq ammaanersiorluni oqalungiarnernut atorneqarneruvoq, ajunngisaarumasoqaqaarlu.
Issittup pisuussutai annertoqisut akisussaassuseqartumik nunap inoqqaavinik ataqqinnittumik nungusaataanngitsumik atorneqassapput. Taama ataatsimeersuarnermi malinnaaffigineqarluartumi ataasinngornermi ammaanersiornermi isumaqatigiittumik oqalungiartut nalunaartarput, Norgep avannaaniittumi Tromsømi ingerlanneqartumi.
Norgemiut, Islandimiut, Canadamiut, Amerikamiut, Russit, Japanimiut Tuluillu tusarliussat assingiipput. Kikkut tamarmik issittumi pisuussutinik piiaaqataarusupput, imaatigullu sikup aanneratigut aqqutinik nutaanik atueqataarusullutik.
Norskit Sametingianni siulittaasup Aili Keskitalo'p oqalungiarnermini apeqquserpaa uuliasiulernissap aatsitassarsiornissallu kingunerisinnaasai.
- Isertuuterusunngilara avannaarsuanut politikkimi- klimamut naleqqussarnerit, nukissiusiornikkut ineriartortitsinerit ataqatigiinnermullu aqqutissiuinerit assorsuaq nunap inoqqaavinut unammillernartuussammata, naalagaaffinni oqartussaasunut suliffissuaatilinnullu maani sulerusuttunut, Ailio Keskitlo oqarpoq.
- Kisianni aamma atugarissaarnerunissamut ammaassissooq nungusaataanngitsumillu pisuussutinik tamatta pigisatsinnik aqutsinissamut. Pisuussutinik piiaaneq nunap inoqqaavinut ajunngitsorsiassaassaaq, toqqaannartumillu kulturiannik inuiaqatigiinnillu nukittorsaallunilu ineriartortitsissalluni, samit siulittaasuat oqarpoq.
Ataatsimeersuqataasut akornanni aamma isumaqatigiissutaavoq, Issittumi Siunnersuisoqatigiit nunarsuarmiullu inatsisaat peqqussusiaallu atorlugit, Issittoq sorsuffiunanilu sakkulersorluni sorsuffiussanngisaannassasoq.
Ataatsimeersuarnerup pingaarnertut qulequtaraa "Inuit issittumiittut". Arfineq pingajussaat Arctic Frontiers ingerlanneqarpoq, aaqqissuisullu uppernarsarsinnaavaat nunarsuarmioqatitta isaat tamarmik avannamut isigilersut. 2007-imi aallartikkamik amerlavallaanngeriarlutik ukioq manna ulikkaangajaavissimapput. Peqataasut 1000-it nunanit 25-iniit Tromsøp ilisimatusarfiani najuupput.
